Урта Чаллы

Халыкта Казаклар исеме белән дә искә алына. 1680 елдан мәгълүм. XVIII йөздә – XIX йөзнең беренче яртысында халкы алпавыт һәм дәүләт крестьяннары катлауларына керә. Бу чорда халкының төп шөгыльләре – игенчелек һәм терлекчелек.

1870 елгы мәгълүматларга караганда авылда мәчет, мәктәп, су тегермәне эшли. Авыл җәмәгатенең имана җире 503,7 дисәтинә тәшкил итә.

1920 елга кадәр авыл Уфа губернасының Минзәлә өязе Тәкмәк волостена керә. 1920 елдан – ТАССРның Минзәлә, 1922 елдан – Чаллы кантонында.

1930 елның 10 августыннан – Ширәмәт, 1963 елның 1 февраленнән – Чаллы, 1965 елның 12 гыйнварыннан – Түбән Кама районында.

Хәзер – Кызыл Чапчак авыл җирлеге үзәге.

1931 елда авылда “Кызыл Чишмә” колхозы оештырыла. 1951 елдан “Октябрь бүләге” колхозында (үзәк утары – Югары Чаллы авылы), 1959 елдан “Татарстан” колхозы (үзәк утары – Түбән Чаллы авылы), 1963 елда “Октябрь бүләге” колхозы итеп үзгәртелә (үзәк утары – Югары Чаллы авылы), 1970 елда совхоз була.

1998–2009 елларда “Чаллы” авыл хуҗалыгы җитештерү кооперативы эшли. 2018 елдан “Орсис-Агро” җаваплылыгы чикләнгән җәмгыяте.

Халкы башлыча үсемлекчелек белән шөгыльләнә.

Авылда совет чорында клуб эшли. Хәзер мәчет (2015 елдан), төзекләндерелгән “Казаклар чишмәсе” (2020 елда) бар.

Авыл янында археология истәлекләре – Урта Чаллы I (XVI–XVII йөзләр) һәм II авыллыгы (гомумболгар ядкәре), Урта Чаллы кабер ташлары сакланган зират табыла.

1870 елда – 304,
1920 елда – 453,
1926 елда – 208,
1949 елда – 209,
1958 елда – 187,
1970 елда – 109,
1979 елда – 84,
1989 елда – 91,
2002 елда – 67,
2010 елда – 56,
2022 елда – 51 кеше (татарлар).