Иске Әлмәт

XVIII йөзнең беренче яртысында нигез салына. Революциягә кадәрге чыганакларда Ельметьево исеме белән телгә алына.

XVIII–XIX йөзләрдә халкы асаба башкортлар катлавына керә. Бу чорда халкының төп шөгыле – игенчелек һәм терлекчелек, шулай ук умартачылык, киез итек басу кәсепчелеге тарала.

1870 ел мәгълүматлары буенча, авылда мәчет, мәктәп, 2 су тегермәне, XX йөз башында 2 су тегермәне, мәчет була.

Авыл җәмәгатенең имана җире 2606,2 дисәтинә тәшкил итә.

1920 елга кадәр Уфа губернасының Минзәлә өязе Әмәкәй волостена керә. 1920 елдан ТАССРның Минзәлә кантонында. 1930 елның 10 августыннан – Мөслим, 1935 елның 10 февраленнән – Калинин, 1959 елның 12 октябреннән – Мөслим, 1963 елның 1 февраленнән – Сарман, 1965 елның 12 гыйнварыннан Мөслим районында.

Хәзер Әмәкәй авыл җирлеге составында.

1929 елда авылда Сталин исемендәге колхоз оештырыла, 1951 елда “Правда” колхозы (Әмәкәй авылы) составына керә. 1993–2006 елларда “Дуслык” крәстиян-фермер хуҗалыгы, 2018 елдан “Август-Мөслим” җаваплылыгы чикләнгән җәмгыяте.

Халкы кырчылык, ит-сөт терлекчелеге белән шөгыльләнә.

2011 елга кадәр авылда башлангыч мәктәп эшли. Авылда клуб (1973 елда яңа бина төзелә), фельдшер-акушерлык пункты бар.

Авыл тирәсендә археология истәлеге – Иске Әлмәт туктаулыгы (буралы курган культурасы).

1795 елда – 33,
1811 елда – 45,
1816 елда – 44,
1834 елда – 110 ир-ат;
1859 елда – 232,
1870 елда – 270,
1906 елда – 519,
1913 елда – 628,
1920 елда – 644,
1926 елда – 396,
1938 елда – 554,
1949 елда – 415,
1958 елда – 371,
1970 елда – 411,
1979 елда – 315,
1989 елда – 159,
2002 елда – 107,
2010 елда – 96,
2017 елда – 91 кеше (татарлар).