Приют-Шуран

XVII йөзнең икенче яртысында нигез салына. Революциягә кадәрге чыганакларда Мазино, Викторовка исемнәре белән телгә алына.

1861 елга кадәр халкы алпавыт крәстияннәре катлавына керә, алпавыт Катанскийлар милкендә була. Җирбиләүчеләр арасында – офицер, җәмәгать эшлеклесе, IV Дәүләт Думасы әгъзасы Н.В.Катанский. Ул үзенең йортында ятим балалар өчен приют ача, шуңа бәйле авыл Приют-Шуран дип атала.

XX йөз башында авылда су тегермәне, 2 ашлык киптергеч, бөртекле ашлык яргыч, икмәк саклау кибете була.

Бу чорда халкының төп шөгыле – игенчелек һәм терлекчелек, шулай ук умартачылык, арба һәм чана ясау кәсепчелеге тарала.

Авыл җәмәгатенең имана җире 105 дисәтинә тәшкил итә.

1920 елга кадәр Уфа губернасының Минзәлә өязе Богодаровка волостена керә. 1920 елдан ТАССРның Минзәлә кантонында. 1930 елның 10 августыннан – Мөслим, 1963 елның 1 февраленнән – Сарман, 1965 елның 12 гыйнварыннан Мөслим районында.

Хәзер Керәш-Шуран авыл җирлеге составында.

1929 елда авылда беренче колхоз оештырыла, озакламый таркала. 1933 елда “Париж коммунасы” колхозы (беренче рәисе – П.М.Новиков) оештырыла, 1950 елда – берләштерелгән К.Маркс исемендәге колхоз, 1958 елда “Коммунизм” колхозы составына керә. 1963 елда “Авангард” колхозы итеп үзгәртелә. 1994 елдан “Авангард” күмәк предприятиесе, 2018 елдан “Август-Мөслим” җаваплылыгы чикләнгән җәмгыяте.

Халкы кырчылык, ит-сөт терлекчелеге белән шөгыльләнә.

1925 елда башлангыч мәктәп (Катанскийлар йортында урнаша) ачыла, соңрак ябыла.

1858 елда – 136,
1870 елда – 193,
1884 елда – 266,
1920 елда – 379,
1926 елда – 312,
1938 елда – 523,
1949 елда – 438,
1958 елда – 349,
1970 елда – 235,
1979 елда – 184,
1989 елда – 100,
2002 елда – 76,
2010 елда – 70,
2017 елда – 66 кеше (руслар).