Спиридоновка

1750 елларда нигез салына.

1860 елларга кадәр халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек, он тарту кәсепчелеге, Уральск шәһәреннән аз тозлы балык ташу тарала.

1883 елгы мәгълүматлар буенча, авылда күн заводы һәм 10 вак-төякләр кибете була.

XX йөз башында волость идарәсе урнаша, Архангел Михаил чиркәве (1889–1902 елларда төзелә; архитектура истәлеге), земство һәм чиркәү-приход мәктәбе, земство почта станциясе, 2 су тегермәне, һәр сишәмбе саен базар эшли.

Авыл җәмәгатенең имана җире 3907 дисәтинә тәшкил итә.

1920 елга кадәр Самара губернасының Бөгелмә өязе Спиридонов волостена керә. 1920 елдан ТАССРның Бөгелмә кантонында. 1930 елның 10 августыннан – Шөгер, 1959 елның 16 октябреннән Лениногорск районында.

Хәзер Зеленая Роща авыл җирлеге составында.

1931 елда авылда “Пролетарий” колхозы оештырыла. 1959 елдан – “Дружба” колхозы, 1970 елдан – “Зеленая Роща” совхозы (үзәк утары – Зеленая Роща авылы), 1976 елдан – “Татнефть” берләшмәсенең ярдәмче хуҗалыгы составында, 1980 елдан – “Лениногорскнефть” НГДУ балансында, 1997 елдан – “Зеленая Роща” җаваплылыгы чикләнгән җәмгыяте, 2005 елдан – “Союз-Агро” җаваплылыгы чикләнгән җәмгыятенең “Зеленогорск” җитештерү комплексы.

Халкы кырчылык, ит-сөт терлекчелеге, дуңгыз асрау белән шөгыльләнә.

Авылда мәдәният йорты (1967 елдан), китапханә, фельдшер-акушерлык пункты (2004 елдан), Архангел Михаил чиркәве (1991 елда реставрацияләнә) бар.

Мәдәният йорты каршында “Винай веле” мордва фольклор коллективы (2014 елдан) эшли.

Авыл янында төзекләндерелгән “Макар латко” һәм “Баба-каль” чишмәләре бар.

Авыл тирәсендә археология истәлекләре – Спиридоновка курганнары төркеме табыла.

В.П.Игнатьев (1918–1992) – график, ТАССРның атказанган сәнгать эшлеклесе, педагогика фәннәре кандидаты.

1859 елда – 617,
1883 елда – 1205,
1889 елда – 1437,
1897 елда – 1720,
1900 елда – 1715,
1910 елда – 2387,
1920 елда – 2252,
1926 елда – 2208,
1938 елда – 1320,
1949 елда – 934,
1958 елда – 1070,
1970 елда – 767,
1979 елда – 549,
1989 елда – 311,
2002 елда – 237,
2010 елда – 196,
2017 елда – 162 кеше (84% – мордвалар, 8% – руслар).