Түбән Чыршылы

1730 елларда нигез салына.

1860 елларга кадәр халкы асаба башкортлар, типтәрләр һәм дәүләт крәстияннәре катлавына бүленә. Бу чорда халкының төп шөгыле – игенчелек һәм терлекчелек.

XIX йөзнең икенче яртысында авыл мәдрәсәсе киң таныла. Аны укучылары һәм укытучылары арасында Р.Фәхретдин дә була.

XX йөз башында авылда волость идарәсе урнаша, 2 мәчет, 2 мәктәп, 2 су тегермәне эшли. Авыл җәмәгатенең имана җире 2770 дисәтинә тәшкил итә.

1920 елга кадәр Самара губернасының Бөгелмә өязе Түбән Чыршылы волостена керә. 1920 елдан ТАССРның Бөгелмә кантонында. 1930 елның 10 августыннан – Шөгер, 1959 елның 12 октябреннән Лениногорск районында.

Хәзер Түбән Чыршылы авыл җирлеге үзәге.

1930 елда авылда “Спартак” колхозы оештырыла. 1950 елда аңа “Хезмәт” колхозы (Югары чыршылы авылы) берләштерелә, 1964 елда – Чапаев исемендәге колхоз (Мордва ивановкасы авылы), 2007 елдан – “Спартак” агрофирмасы” җаваплылыгы чикләнгән җәмгыяте.

Халкы күбесенчә кырчылык, ит-сөт терлекчелеге белән шөгыльләнә.

1918 елда авылда башлангыч мәктәп ачыла, 1965 елда – урта (2001 елдан яңа бинада), 2015 елда тулы булмаган урта мәктәп итеп үзгәртелә.

Авылда балалар бакчасы (1986 елдан), мәдәният йорты (1978 елдан), китапханә (1978 елдан), фельдшер-акушерлык пункты (1986 елдан), “Әбүзәр” мәчете (1993 елдан) бар.

Мәдәният йорты каршында “Йолдыз” балалар театр коллективы (2010 елдан) эшли.

Авыл янында төзекләндерелгән чишмәләр бар: “Заһит чишмәсе”, “Тукмак елга”.

2009 елда Р.Фәхретдингә һәйкәл ачыла.

Б.Ф.Фәрхетдинов (1925–2008) – спортчы (авыр атлетика), СССРның атказанган спорт остасы, дөнья чемпионы (1954 ел), Европа чемпионы;

А.М.Хәйретдинов (1924–1944) – матрос, Советлар Союзы Герое, Лениногрск шәһәрендә бер урам аның исеме белән атала һәм Геройлар аллеясында бюст куелган, Сходнево-Чертанла авылында бюст куелган.

1859 елда – 974,
1889 елда – 1562,
1910 елда – 2078,
1920 елда – 2240,
1926 елда – 2014,
1938 елда – 1647,
1949 елда – 1576,
1958 елда – 1340,
1970 елда – 1323,
1979 елда – 1216,
1989 елда – 808,
2002 елда – 774,
2010 елда – 697,
2017 елда – 791 кеше (татарлар).