Кәркәүч

1710–1711 еллардан мәгълүм.

1860 елларга кадәр халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда мәчет, мәктәп (1890 елдан, беренче укытучылары – Ш.Габделваһапов, М.Баһманова), тегермән, ярма яргыч, 5 вак-төякләр кибете эшли.

Авыл җәмәгатенең имана җире 990,7 дисәтинә тәшкил итә.

1920 елга кадәр Казан губернасының Мамадыш өязе Келәүш волостена керә. 1920 елдан ТАССРның Мамадыш кантонында. 1930 елның 10 августыннан – Кукмара, 1935 елның 10 февраленнән – Тәкәнеш, 1963 елның 1 февраленнән – Саба, 1965 елның 12 гыйнварыннан Кукмара районында.

Хәзер Кәркәүч авыл җирлеге үзәге.

1930 елда авылда “Ударник” колхозы оештырыла, 1950 елдан – Тукай исемендәге колхоз (Кәркәүч авылы), 1962 елдан – “Ударник” колхозы (Кәркәүч авылы), 1993 елдан – Тукай исемендәге күмәк авыл хуҗалыгы предприятиесе, 2003 елдан – “Тукай” авыл хуҗалыгы җитештерү кооперативы, 2006 елдан – “Тукай” агрофирмасы” җаваплылыгы чикләнгән җәмгыяте, 2018 елдан “Уңыш” җаваплылыгы чикләнгән җәмгыяте составында.

Халкы сөт терлекчелеге белән шөгыльләнә.

1918 елда авылда башлангыч мәктәп ачыла (1923 елда яңа бина төзелә), 1933 елда – җидееллык (Битләнгер, Бурсыкъелга, Югары Өскебаш, Салтык-Ерыклы, Татар Толлысы, Ташлы Елга авылларыннан балалар укый), 1959 елда – сигезьеллык, 1971 елда – урта (1982 елда яңа бина төзелә), 2015 елда тулы булмаган урта мәктәп (шулай ук Бурсыкъелга, Салтык-Ерыклы, Ташлы Елга авылларыннан балалар укый) итеп үзгәртелә. 2001 елдан ТАССР һәм РСФСРның атказанган сәнгать эшлеклесе, РФ һәм ТРның халык артисты Ф.Ә.Әхмәтов исеме белән атала.

Мәктәп каршында тарих-төбәкне өйрәнү музее (1983 елдан, оештыручылары – М.М.Сафина һәм З.А.Хантимерова) эшли.

Авылда шулай ук клуб (1989 елдан), балалар бакчасы (1969 елдан, 2004 елдан яңа бинада), китапханә (1957 елдан), мәчет (1995 елдан), фельдшер-акушерлык пункты (1989 елдан) бар.

Клуб каршында татар халык театры (2017 елдан, 2018 елдан “халык” исемен ала, оештыручысы – Г.Х.Насыйров) эшли.

Төзекләндерелгән 3 чишмә бар.

Р.Х.Муллин (1947–2019) – актер, ТРның атказанган артисты, ТРның халык артисты.

1782 елда – 39 ир-ат;
1859 елда – 362,
1897 елда – 675,
1908 елда – 779,
1920 елда – 776,
1926 елда – 739,
1949 елда – 669,
1958 елда – 559,
1970 елда – 527,
1979 елда – 448,
1989 елда – 375,
2002 елда – 400,
2010 елда – 354,
2017 елда – 312 кеше (татарлар).