Яңа Шигали

XVIII йөзнең беренче чирегенә кадәр нигез салына.

1860 елларга кадәр халкы удел крәстияннәре катлавына керә. Бу чорда халкының төп шөгыле – игенчелек һәм терлекчелек, шулай ук тимерчелек кәсепчелеге тарала. Авылда 4 сәүдә-сәнәгать оешмасы эшли.

XX йөз башында авыл җәмәгатенең имана җире 713 дисәтинә тәшкил итә.

1920 елга кадәр Сембер губернасының Буа өязе Үби волостена керә. 1920 елдан ТАССРның Буа кантонында. 1930 елның 10 августыннан – Чүпрәле, 1963 елның 1 февраленнән – Буа, 1966 елның 30 декабреннән Чүпрәле районында.

Хәзер Звезда авыл җирлеге составында.

1930 елда авылда “Правда” колхозы оештырыла (беренче рәисе – В.Т.Калмыков). 1950 елда берләштерелгән “Слава Сталину” колхозына керә, 1957 елдан “Дружба” колхозы (Хорновар-Шигали авылы) составында.

1996 елдан – “Дружба” күмәк предприятиесе, 2004 елдан – “Шигали” җаваплылыгы чикләнгән җәмгыяте, 2008 елдан – “Колос” агрофирмасы” җаваплылыгы чикләнгән җәмгыятенең “Шигали” филиалы, 2010 елдан – “Корм Дрожжановский” җаваплылыгы чикләнгән җәмгыятенең “Шигали” филиалы. 2015 елдан колхоз җирләре “П.В.Дементьев исемендәге агрофирма” һәм “Ак Барс Дрожжаное” җаваплылыгы чикләнгән җәмгыятьләре карамагында, шулай ук “Афанасьев А.В.” һәм “Клементьева О.Г.” крәстиян-фермер хуҗалыклары фермерлары тарафыннан арендага алына.

Халкы кырчылык, ит-сөт терлекчелеге белән шөгыльләнә.

2019 елга кадәр башлангыч мәктәп эшли. Авылда клуб (1948 елдан), фельдшер-акушерлык пункты (2015 елдан), Александр Невский чиркәве (2012 елдан) бар.

Клуб каршында “Шахаль” чуаш фольклор коллективы (2008 елдан) эшли.

А.С.Чебанов (1937–2011) – чуаш драматургы, шагыйрь, прозаик, публицист, РФ Язучылар берлеге әгъзасы, Чуаш Республикасының атказанган мәдәният хезмәткәре.

1747 елда – 187 ир-ат;
1859 елда – 308,
1897 елда – 541,
1913 елда – 648,
1920 елда – 830,
1926 елда – 1131,
1938 елда – 652,
1949 елда – 776,
1958 елда – 766,
1970 елда – 642,
1979 елда – 549,
1989 елда – 314,
2002 елда – 297,
2010 елда – 239,
2018 елда – 225 кеше (чуашлар).