Кече Үби

XVII йөздән мәгълүм. Революциягә кадәрге чыганакларда шулай ук Тархан Убеи, Служивые Убеи исемнәре белән телгә алына.

1860 елларга кадәр халкы удел крәстияннәре (1797 елга кадәр – сарай) катлавына керә. Бу чорда халкының төп шөгыле – игенчелек һәм терлекчелек, шулай ук итек тегү, агач эше, такта яру кәсепчелеге тарала.

XX йөз башында авыл җәмәгатенең имана җире 1298,3 дисәтинә тәшкил итә.

1920 елга кадәр Сембер губернасының Буа өязе Үби волостена керә. 1920 елдан ТАССРның Буа кантонында. 1930 елның 10 августыннан – Чүпрәле, 1963 елның 1 февраленнән – Буа, 1966 елның 30 декабреннән Чүпрәле районында.

Хәзер Үби авыл җирлеге составында.

1927 елда – җирне уртак эшкәртү буенча “Рассвет” ширкәте, 1930 елда “Маяк к социализму” колхозы (беренче рәисе – В.Н.Мурзин) оештырыла, 1959 елда берләштерелгән Чапаев исемендәге (Яңа Үби авылы) колхозга керә, 1994–2009 елларда – “Восход” крәстиян хуҗалыклары ассоциациясе, 2015 елдан “П.В.Дементьев исемендәге агрофирма” җаваплылыгы чикләнгән җәмгыяте составында.

Авылда балалар бакчасы (1984 елдан), фельдшер-акушерлык пункты бар.

И.А.Зотов (1917–1983) – педагог, БАССРның атказанган фән эшлеклесе, философия фәннәре докторы, Бөек Ватан сугышында катнаша, Кызыл Йолдыз, 2 нче дәрәҗә Ватан сугышы орденнары кавалеры;

В.Н.Игнатьева (псевдонимы Тарават) (1946 елда туган) – чуаш шагыйрәсе, язучы, тәрҗемәче, композитор, РФнең атказанган мәдәният хезмәткәре, РФ Язучылар союзы әгъзасы;

А.Н.Музыкантов (1950 елда туган) – биюче, балетмейстер, музыка коллективлары җитәкчесе, Чуаш АССР һәм РФнең атказанган мәдәният хезмәткәре.

1859 елда – 531,
1897 елда – 799,
1913 елда – 1025,
1920 елда – 1043,
1926 елда – 1143,
1938 елда – 1184,
1949 елда – 1065,
1958 елда – 1035,
1970 елда – 995,
1979 елда – 747,
1989 елда – 460,
2002 елда – 416,
2010 елда – 373,
2018 елда – 363 (чуашлар).