Яңа Зареченский

Поселокка 1910 елларда Лубаш поселогы буларак нигез салына, 1931 елдан 204 нче совхоз поселогы (соңрак – “Баулы”), 1993 елдан хәзерге исемдә.

Оешкан көненнән Самара губернасының Самара өязе Поповка волостена керә. 1920 елдан ТАССРның Бөгелмә кантонында.

1930 елның 10 августыннан – Баулы, 1963 елның 1 февраленнән – Бөгелмә, 1965 елның 12 гыйнварыннан Баулы районында.

Хәзер Яңа Зареченский авыл җирлеге үзәге.

Халкы күбесенчә кырчылык, сөт терлекчелеге белән шөгыльләнә.

1934 елда поселокта җидееллык мәктәп, 1964 елда сигезьеллык, 1968 елда – урта мәктәп (1976 елда яңа бина төзелә), 2016 елда – тулы булмаган мәктәп итеп үзгәртелә.

2015 елдан мәктәп каршында милли мәдәният музее эшли.

Мәдәният йорты (1973 елдан), китапханә, табиб амбулаториясе бар (1971 елдан).

1920 елда – 142,
1926 елда – 181,
1938 елда – 341,
1958 елда – 1421,
1970 елда – 901,
1979 елда – 768,
1989 елда – 717,
2002 елда – 655,
2010 елда – 647,
2015 елда – 614 кеше (татарлар – 64%).