Бубеннов Михаил Семенович

1909 елның 21 ноябре, хәзерге Алтай краеның Икенче Поломошново авылы – 1983 елның 3 октябре, Мәскәү.

Әсәрләре 1927 елда басыла башлый.

1931–1941 елларда ТАССР районнарында, «Красная Татария» газетасында (1935 елдан) эшли.

1939 елда Ә.Вәлиев белән берлектә «Освобождение Казани от белоинтервентов в 1918 году» дигән китап, М.Савосин белән берлектә Хәсән күле тирәсендә барган героик сугышлар турында хикәяләр («За Родину» җыентыгында басылган, 1939) яза.

«В половодье» (1940) җыентыгына кергән хикәяләре, «Бессмертие» (1940) тарихи-революцион повесте Кама буенда гражданнар сугышы вакыйгаларына нигезләнеп язылган.

М.С.Бубеннов Бөек Ватан сугышы еллары тасвирланган «Белая берёза» (1 нче китап, 1947, СССР Дәүләт бүләге, 1948; 2 нче китап, 1952), чирәм җирләрне күтәрүчеләр турындагы «Орлиная степь» (1959), яшь төзүчеләр, Себерне үзләштерүчеләргә багышланган «Стремнина» (1970) романнары белән таныла.

Ике Кызыл Байрак ордены, медальләр белән бүләкләнә.

Собрание сочинений: в 4 т. М., 1981–1982.

Ачкасова Л.С. Творчество М.С.Бубеннова: автореф. дис. ... Казань, 1953.

Автор – Л.С.Ачкасова