1908 елның 7 мае, Түбән Новгород губернасы, Сергач өязе Актук авылы – 1962 елның 14 декабре, Казан.

Түбән Новгород педагогика техникумын (1926), Мәскәү музыка училищесен (1938) тәмамлый.

1941–1962 елларда Татар филармониясе солисты. 1940–1950 елларда татар эстрада җырчылары арасында иң актив концерт эшчәнлеге алып баручылардан санала. Халыкта зур популярлык казана.

Ваһапов – татар халык җырларын һәм татар композиторлары әсәрләрен иң оста башкаручыларның берсе. Башлыча, лирик планда җырлый. Матур тембрлы көчле тавышка, милли музыка мирасының алтын фондына кергән әсәрләрне тыңлаучыга бөтен тирәнлеге белән җиткерү сәләтенә ия була.

Ваһапов башкаруында татар җырлары «Уел», «Кара урман», «Галиябану», «Зөләйха», «Нурия», «Рәйхан», «Эскадрон», «Гөлҗамал», татар композиторлары С.Сәйдәшев, М.Мозаффаров, Җ.Фәйзи җырлары популярлык казана.

Милли вокаль-концерт сәнгатенә нигез салучыларның берсе буларак, Р.Ваһапов татар музыка культурасына зур өлеш кертә.

Актив концерт эшчәнлеге алып бара, СССР шәһәрләре буйлап гастрольләрдә еш була.

Истәлеге

2004 елдан Рәшит Ваһапов истәлегенә Халыкара «Татар җыры» фестивале уздырыла.

2007 елда Рәшит Ваһапов исемендәге фонд булдырыла.

2008 елда туган авылында җырчыга һәйкәл куела, 2016 елда районның милли үзәге булган Уразавылда ике бөек җырчы – Рәшит Ваһапов һәм Хәйдәр Бигичев истәлегенә мемориал комплекс ачыла.

Казанның бер урамы Рәшит Ваһапов исемен йөртә.

Фәттахов Р. Рәшит Ваһапов: Тормышы һәм иҗаты. Казан, 2000.

ХайруллинаЗ. Вагапов Рашит Вагапович // Народные артисты. Казань, 1980.

Фәттахов Р. Рашит Вагапов: Личность. Творчество. Эпоха. Казань, 2003.