Чепья районы

1938 елның 4 августында оештырыла.

Үзәге — Чепья авылы. 1920 елга кадәр район территориясе Казан губернасының — Казан, Вятка губернасының Малмыж өязләрендә, 1920 елдан ТАССРның Арча кантонында һәм Вятка губернасының Малмыж өязендә, 1921 елдан ТАССРның Арча кантонында, 1930 елдан — Түнтәр, 1932 елдан Балтач районында.

1940 елда районның мәйданы — 521 км², халык саны — 24,8 мең кеше, 23 авыл советы, 51 торак пункт исәпләнә. 1956 елда районның мәйданы 524,6 км² була, 15 авыл советын һәм 49 торак пунктны берләштерә.

1958 елның 16 июлендә Чепья районы таркатыла, территориясе Балтач районы составына кертелә.