Сафиуллин Гани Биккенә улы

1905 елның 1 июле, Казан губернасы, Казан өязе (хәзерге Арча районы) Иске Кишет авылы – 1973 елның 14 октябре, Казан

Мәдрәсәдә укый. 1922 елда Тургай даласына (хәзерге Казахстан) көтүче булып эшкә китә. 1923-1926 елларда край совпарт мәктәбендә укый.1926–1927 елларда Семипалатинск (Казакъстан ССР) шәһәрендә Бухтарма өяз комсомол комитетында инструктор булып эшли.

Запастагы взвод командирлары мәктәбен (1928), М.В.Фрунзе исем. Хәрби академияне (Мәскәү, 1941), К.Е.Ворошилов исем. СССР Кораллы Көчләре Генштабының Хәрби академиясе каршындагы Югары академик курсларын (Мәскәү, 1947) тәмамлый.

1927 елдан Кызыл Армия сафларында.

1941 елның июненнән Бөек Ватан сугышы фронтларында, 38 нче укчы дивизия һәм 25 нче гвардия укчы корпусы командиры (7 нче гвардия армиясе).

Сафиуллин дивизиясе Сталинград янындагы сугышта дошманның 18 меңнән артык солдат һәм офицерын әсир төшерә. Дон, Воронеж, Дала һәм 2 нче Украина фронтлары гаскәрләре составында Сталинград сугышында (1942–1943), Кировоград (1944), Яссы-Кишинев (1944), Будапешт (1944–1945), Прага (1945) һөҗүм операцияләрендә һәм япон гаскәрләренә каршы сугышта (1945) катнаша.

Днепр елгасын кичеп, Бородаевка һәм Домоткань (Украина ССР, Днепропетровск өлкәсенең Верхнеднепровский районы) авыллары янындагы сугышта Сафиуллин батырлык күрсәтә. 1943 елның 25–30 сентябрендә Г.Сафиуллин җитәкчелегендәге солдатлар төркеме елганы кичеп чыга. Дошманның өзлексез һөҗүменә каршы торып, яуланган плацдармның буен 25 км га, иңен 15 км га зурайта һәм, төп көчләр килгәнче, аны кулда тотып тора.

Сугыштан соң 38 нче гвардия һава-десант корпусы белән җитәкчелек итә.

1957 елдан запаста. Казанда яши, ДОСААФның Татарстан Республикасы комитетын җитәкли.

Сугыш турында мемуарлар авторы.

Ике Ленин ордены, өч Кызыл Байрак, ике 2 нче дәрәҗә Суворов, ике 2 нче дәрәҗә Кутузов орденнары, медальләр белән бүләкләнә.

Герой бюстлары Арча шәһәрендә һәм Иске Кишет авылында «Дан» мемориаль комплексы территориясендә урнаштырыла.

Казан, Арча, Иске Кишет урамнарына аның исеме бирелә. Туган авылында Герой истәлегенә музей комплексы ачыла.

Через реки, через горы... Казань, 1973.

Дорогами Победы. Казань, 1987.

Батырлар китабы – Книга Героев. Казань, 2000;

Населённые пункты Республики Татарстан: иллюстрированная энциклопедия: в 3 т. Казань, 2018. Т. 1. С. 417, 418, 455, 470, 471;

Книга Героев = Батырлар китабы / сост.: М.В.Черепанов, Е.В.Панов. Казань, 2022. С. 140.

Авторлар — М.З.Хәбибуллин, Л.М.Айнетдинова, Г.Х.Галимуллина