Романов Григорий Григорьевич

1907 елның 23 сентябре, Казан губернасы, Чистай өязе Кәкрекүл авыл – 1987 елның 28 июне, Алабуга шәһәре.

Татар коммунистик университетын (Казан, 1932 ел), Хәрби сәяси курслар (1942 ел) тәмамлый.

Туган авылында уку йорты мөдире, авыл советы секретаре, рәисе булып эшли.

1941 елдан Кызыл Армия сафларында. 1942 елның маеннан Бөек Ватан сугышы фронтларында, 128 нче гвардия укчы полкының тупчылар взводы командиры (65 нче армиянең 44 нче гвардия укчы дивизиясе). 1 нче һәм 2 нче Белоруссия фронты гаскәрләре составында Белоруссия (1944 ел) һәм Млава-Эльба (1945 ел) һөҗүм операцияләрендә катнаша.

Сероцк шәһәреннән (Польша) төньяктарак Нарев елгасы янындагы плацдармны саклаганда батырлык күрсәтә: 1944 елның 5 октябрендә Г.Г.Романов командалыгындагы артиллеристлар Дзержинец авылы янында дошман контратакасын кире кайтарганда 5 танкны сафтан чыгаралар һәм зур төркем пехотасын юк итәләр; Г.Г.Романов яралана, ләкин сафта кала.

Авыр яраланудан соң, 1945 елда, армиядән демобилизацияләнә.

Туган авылында яши һәм эшли, аннары Алабуга шәһәренә күчә.

1946–1954 елларда СССР Югары Советы депутаты. Ике Ленин ордены, 1 нче дәрәҗә Ватан сугышы ордены һәм медальләр белән бүләкләнә.

Алабуга шәһәрендә Геройга бюст куела.

Батырлар китабы – Книга Геров. Казан, 2000.

Автор – М.З.Хәбибуллин