Абзалов Рем Абзал улы

1914 елның 28 июне, Татарстанның Казан губернасы Тәтеш өязенең (хәзерге Апас районы) Урта Балтай авылы – 1983 елның 7 феврале, Ташкент.

Казан университетында рабфакта укый. Казан авиация заводында профком рәисе булып эшли.

1939–1940 елларда совет-фин сугышында катнаша.

Политсостав курсларын тәмамлый.

1942 елдан Бөек Ватан сугышы фронтларында, 4 гвардия армиясенең 40 гвардия укчы дивизиясе 116 нчы гвардия укчы полкының укчы ротасы командиры. 3 нче Украина фронты гаскәрләре составында Украина, Молдавия, Венгрия, Румыния, Югославияне азат итү сугышларында катнаша.

1944 елның 1 декабрендә Дунапатай авылы тирәсендә (Венгрия) Дунайны кичкәндә батырлык күрсәтә.  Дунай елгасын кичеп, Абзаловның ротасы плацдарм яулый, дошманның 80 ләп солдатын юк итә һәм 145 ен әсирлеккә ала. 

«Выстрел» Югары командирлар курсын тәмамлый (1946). Төркестан хәрби округы полкы белән командалык итә.

1950-1960 елларда Ташкент шәһәр хәрби комиссариатының хәрби комиссары.

Ленин, ике Кызыл Йолдыз ордены, медальләр белән бүләкләнә.

Истәлеге

Урта Балтай тулы булмаган урта мәктәбенә Абзалов исеме бирелә (2000), төбәк тарихы музеенда геройга багышланган экспозиция ачыла, Апас авылында Геройлар Аллеясында бюсты куела.

Герои Советского Союза – наши земляки. Казань, 1982. Кн. 1.

Березняк Н.Г. Герои Советского Союза – узбекистанцы. Ташкент, 1984.

Населенные пункты Республики Татарстан: иллюстрированная энциклопедия: в 3 т. Казань: Институт татарской энциклопедии и регионоведения АН РТ, 2018. Т. 1. С. 372, 374, 396.

Книга Героев = Батырлар китабы// сост.: М.В. Черепанов, Е.В. Панов. – Казань, 2022.