1915 елның 1 ноябре, Уфа губернасы, Минзәлә өязе Яңа Мәлкән авылы — 1945 елның 5 феврале, Эльбинг шәһәре, Польша.

Ленинград артиллерия училищесен тәмамлый (1938).

Казанда яши һәм эшли.

1934–1935 елларда һәм 1941 елдан Кызыл Армиядә. 1941 елның июненнән Бөек Ватан сугышы фронтларында, 398 нче җиңел артиллерия полкының (65 нче армиянең 18 нче артиллерия дивизиясенең 65 нче җиңел артиллерия бригадасы) дивизион командиры. Дон, Үзәк, 1 нче һәм 2 нче Белоруссия фронтлары гаскәрләре составында Сталинград (1942–1943), Курск (1943) сугышларында, Чернигов-Припять, Гомель-Речица (икесе дә — 1943), Белоруссия (1944) һәм Көнчыгыш Пруссия (1945) һөҗүм операцияләрендә катнаша. Эльбинг тирәсендә Висла елгасы аша чыкканда батырлык күрсәтә: 1945 елның 5 февралендә, контрһөҗүмнәрне кире кайтарганда батареялар уты белән оста идарә итеп, дошманның тере көчләрен һәм хәрби техникасын зур югалтуларга дучар итә, сугышта һәлак була.

Ленин ордены, Кызыл Байрак, Александр Невский орденнары, медаль белән бүләкләнә.

Минзәлә шәһәрендәге бер урам С.М.Тапиков исемен йөртә.

Батырлар китабы — Книга Героев. Казань., 2000.