Лесосибирск

Енисей елгасының сул ярында, Красноярск шәһәреннән 275 км төньяктарак урнашкан. 1975 елда Маклаково һәм Новомаклаково поселоклары урынында нигез салына.

Халкы – 59844 кеше (2016 ел). Татарлар 2010 елда – 4611 кеше.

Лесосибирск шәһәренә татарлар Транссебер тимер юлын төзү елларында (1891–1916), Столыпин аграр реформасы (1906–11 елларда), 1921–1922 еллардагы Идел буендагы ачлык вакытында килеп урнаша.

Хәзерге вакытта шәһәрдә «Ватан» татар милли-мәгърифәт үзәге (1991 елдан), «Дуслар» татар милли-мәдәни оешмасы (2002 елдан); «Язлар» вокаль-хореография ансамбле эшли.

Сабан туе, ел саен әниләр көненә багышланган «Әнием минем» концерты, Татар китабы көне үткәрелә, Татарстаннан килгән артистлар чыгышлары, татар дискотекалары оештырыла, балалар Татарстан Республикасы җәйге лагерьларына җибәрелә.