Сөләйман мөһере

50 гә якын төре билгеле, күбесенчә Төньяк ярымшарның уртача поясында таралганнар. ТРда 2 төре бар: күп чәчәкле Сөләйман мөһере (P. multiflorum) һәм дарулы (хуш исле) Сөләйман мөһере (P. odoratum). Республиканың барлык терр-ясендә очрый. Киң яфраклы һәм ылыслы-киң яфраклы урманнарда, куаклар арасында үсәләр.

15–100 см биеклектәге үсемлекләр. Тамырчасы горизонталь, җир өсте ботакларының түгәрәк батынкы җөйләр — «мөһер» калдырып корыган урыннарында юанаеп тора. Дарулы Сөләйман мөһеренең сабагы кырлы, күп чәчәкле Сөләйман мөһеренең цилиндрсыман. Яфраклары чиратлашкан, ланцетсыман яки озынча түгәрәк-эллиптик, ике яклап дугасыман бөгелгән сабакларда. Чәчәкләренең күп өлеше яшькелт-ак төстә, яфрак куентыгында урнашканнар. Дарулы Сөләйман мөһере 1–2, күп чәчәкле Сөләйман мөһере 2–5 чәчәкле. Җимеше — 1–2 орлыклы зәңгәрсу-кара җиләк. Май–июньдә чәчәк аталар. Җимешләре июль–августта өлгерә. Орлыктан үрчиләр.

Дарулы Сөләйман мөһеренең тамырчасында алкалоид, сапонин, лайла, С витамины бар.

Халык медицинасында тамырчаларыннан ясалган төнәтмә бронхиттан, үпкә ялкынсынуыннан, эчке органнар җәрәхәте, баш авыруларыннан кулланыла.

Үсемлекнең барлык өлешләре дә (аеруча җимешләре) костыру үзлегенә ия.

Декоратив, баллы, агулы үсемлекләр.