Резеда

60 ка якын төре билгеле, Евразиядә, Төньяк Африкада, башлыча, Урта диңгез буенда таралганнар. Татарстан территориясендә бер төре — сары резеда (R. lutea) Идел алдында һәм Көнчыгыш Кама аръягында очрый. Карбонатлар чыгып торган урыннарда, тимер юл өемнәрендә, юл буйларында, ара-тирә чүп үләне буларак кырларда үсә.

30–50 см биеклектәге күпьеллык үсемлек. Тамыр системасы юанрак төп һәм нечкәрәк ян тамырлардан тора. Сабагы ботаклы. Яфраклары чиратлашкан, каурыйсыман-теленмә. Чәчәкләре вак, аксыл яки яшькелт-сары, озын чукларга җыйналган. Җимеше — өч кырлы озынча тартмачык. Май — сентябрьдә чәчәк ата. Җимешләре июль — октябрьдә өлгерә. Орлыктан үрчи.

Яфракларында С витамины, орлыкларында эфир мае бар.

Халык медицинасында үлән төнәтмәсе тир чыгару һәм бәвел кудыру чарасы буларак кулланыла.

Ак чәчәкле хуш исле резедане (R. odorata) декоратив үсемлек буларак бакчаларда үстерәләр.

Баллы үсемлекләр.