Нефедьев Евгений Алексеевич

1851 елның 7 июне, Сембер губернасы, Сызрань өязе Ратовка авылы — 1910 елның 12 марты, Мәскәү.

Дворяннар нәселеннән.

Мәскәү университетын тәмамлый (1875).

1875–1881 елларда Сызрань өязе җәмәгать судьясы.

1881–1882 елларда Казан мәхкәмә палатасы округ антлы ышанычлысы. 1882–1888 елларда Казан университетының гражданлык мәхкәмәсе эшләре кафедрасы приват-доценты, 1888–1892 елларда экстраординар профессоры, 1892–1896 елларда гражданлык хокукы кафедрасы ординар профессоры. 1896–1907 елларда Мәскәү университетының сәүдә хокукы һәм мәхкәмә эшләре кафедрасы ординар профессоры, 1907 елдан атказанган профессоры.

Хезмәтләре гражданлык хокукы һәм процессы, сәүдә, су хокукы мәсьәләләренә карый. «Гражданлык процессында судьяларны эштән азат итү» («Устранение судей в гражданском процессе», 1885) хезмәтендә Гражданлык процессы уставының эштән бушатылырга тиешле судьяларны чагыштырмача булдыксызларга һәм шиклеләргә бүлү кагыйдәләрен эшли. «Гражданлык процессында якларны килешүгә этәрү» («Склонение сторон к миру в гражданском процессе», 1890) хезмәте якларны килештерүдә мәхкәмәнең бурычларын өйрәнүгә багышлана.

«Гражданлык процессының асылы турындагы тәгълиматка. Гражданлык процессында бергә катнашу» («К учению о сущности гражданского процесса. Соучастие в гражданском процессе», 1891) монографиясендә процессның теориясен ачып бирә һәм аны бергә катнашу турындагы өйрәтүләргә карата куллана. «Дәгъва турындагы тәгълимат» («Учение об иске», 1895) дигән эшендә дәгъвага карата яңа караш булдыра. Хокук тарихы буенча тикшеренүләре бар; «Сперанский карашыннан чыгып, Тулы тупланма һәм Законнар җыентыгын бастырып чыгаруның сәбәбе һәм максаты» («Причина и цель издания Полного собрания и Свода законов с точки зрения Сперанского», 1889) хезмәтенең авторы. «Гражданлык мәхкәмәсе процессы курсы»нда («Курс гражданского судопроизводства», 1–3 чыг., М., 1902–06) Россиядә 1864 елгы мәхкәмә реформасыннан соң гражданлык процессы башлангычын һәм принципларын һәркемгә аңлаешлы формада һәм фәнни нигездә бәян итә.

О способах освобождения недвижимых имуществ от описи третьими лицами, не имеющими на свои имущества актов укрепления. К., 1881;

Производство в коммерческих судах. К., 1893;

Основные начала гражданского судопроизводства. К., 1895;

Очерки по водному праву. М., 1899;

Учебник торгового права. М., 1904.

Гольмстен авыл хуҗалыгы Е.А.Нефедьев: Некролог // Журн. М-ва юстиции. 1910. № 10;

Биографический словарь профессоров и преподавателей Императорского Казанского университета (1804–1904). К., 1904. Ч. 2.

Автор — Е.Б.Долгов