Насыров Семён Рафаилович

1958 елның 14 декабрендә Казанда туа.

1979 елда Казан университетын тәмамлый, шунда ук эшли: Математика һәм механика фәнни-тикшеренү институтында һәм математика анализ кафедрасында (1987 елдан, 1998 елдан кафедрасы мөдире), механика-математика факультеты деканы (1996 елдан), профессор (1998).

Хезмәтләре комплекслы үзгәрешле функцияләр теориясенә, кырый мәсьәләләргә, риманча өслекләргә карый. Насыров риманча өслекләрдә ирекле чикләре булган яңа класс кырый мәсьәләләрнең чишелүчәнлеген билгели; аналитик функцияләр бербитлелегенең җитәрлек шартларын таба; риманча өслекләр төшенә таба җыелучанлыкның төрле төрләрен кертә һәм өйрәнә; мероморф функцияләр эзлеклелеге җыелучанлыгы белән аларга тиңдәш булган риманча өслекләр төшләренә таба җыелучанлык арасында бәйлелек турында күп кенә теоремаларны исбатлый; битләрнең төренә һәм санына карата төрле фаразлар өстәп бирелгән кәкреләр белән чикләнгән риманча өслекләрнең булуы өчен кирәкле һәм җитәрлек шартлар таба; туры һәм кире кырый мәсьәләләр чишүнең күп кенә билгеле якынча алымнарының җыелучанлыгын дәлилли; иң зур күтәрү көченә ия булган аэродинамик дуга табу турындагы гомумиләштерелгән М.А.Лаврентьев мәсьәләсенең чишелүчәнлеген тикшерә.

Математика, механика һәм информатикадан яшьләр мәктәп-конференцияләрен үткәрү буенча Н.И.Лобачевский исемендәге математика үзәкне оештыручы.

Смешанная обратная краевая задача на римановых поверхностях // Изв. вузов. Математика. 1990. № 10;

Разветвлённые накрытия римановых поверхностей с заданной проекцией края // Алгебра и анализ. 1993. Т. 5, № 3;

Метрическое пространство римановых поверхностей над сферой // Мат. сб. 1994. Т. 185, № 7;

К экстремальной задаче М.А.Лаврентьева о подъёмной силе при обтекании дужки малой кривизны // Докл. РАН. 1999. Т. 365, № 5.