Галимуллин Фоат Галимулла улы

1941 елның 21 мартында Кукмара районы Арпаяз авылында туган.

Казан педагогика институтын тәмамлый (1974). 1957–1960 елларда Арпаяз авыл клубы мөдире, 1960–1962 елларда Кукмара районы мәдәният сарае каршындагы татар театры җитәкчесе, 1965–1967 елларда КПССның Кукмара райкомы инструкторы, 1967–1974 елларда ТАССР Министрлар советы каршындагы Телевидение һәм радио комитеты дикторы.

1974 елдан Казан педагогика университетында: татар әдәбияты кафедрасы укытучысы, тарих-филология факультеты деканы (1986–1991), татар әдәбияты кафедрасы мөдире (1995–2000, 2005 елдан). Бер үк вакытта 1975 елдан республика радиосында «Тел күрке – сүз» тапшыруын алып бара.

1999–2005 елларда Татарстан Язучылар берлеге идарәсе рәисе.

Татарстан Республикасы Дәүләт Советы депутаты (1999–-2009).

Хезмәтләре ХХ йөз татар әдәбияты үсешенең закончалыкларына, 1920–1930 еллар татар әдәбиятын өйрәнүдә эстетик һәм социологик категорияләрнең үзара мөнәсәбәтләренә, татар әдәбиятын урта һәм югары мәктәптә укыту методикасына карый.

Урта мәктәп өчен мәктәптә сәнгатьле уку теориясе һәм практикасына багышланган хезмәтләр, татар әдәбияты дәреслекләре авторы.

Инешләр Иделгә кушыла. Казан, 1985.

Укучыларны сәнгатьле укырга өйрәтү. Казан, 1988.

Эстетика һәм социологизм. Казан, 1998.

Әле без туганчы... 1920–1930 еллар әдәби хәрәкәтенә бер караш. Казан, 2001.

Эзләнү вакыты: XX–XXI гасырлар чигендәге әдәби мохит хакында. Казан, 2005.

Хатипов Ф. Ипле галим, төпле тәнкыйтьче // Казан утлары. 2001, № 3.

 Сибат Р. Еллар сыйган мизгелләр // Көлдән күтәрелгән гөлләр. Казан, 2002.