Сафоново

Авылга XVII йөз башында нигез салына, XVII йөзнең икенче яртысыннан – Раифа Богородица пустыне вотчинасы. Революциягә кадәрге чыганакларда Сумка исеме белән дә мәгълүм.

1764 елда халкы монастырь крәстияннәреннән – экономик, соңрак дәүләт крәстияннәре катлавына күчерелә. Бу чорда халкының төп шөгыле – игенчелек һәм терлек асрау, умартачылык, он тарту, күмер яндыру, киндер сугу, таш эшкәртү кәсепчелеге таралган була.

Авыл Ильинский авлының Илья пәйгамбәр чиркәве приходына карый.

XX йөз башында 2 җил тегермәне, 2 вак-төякләр кибетеэшли. Бу чорда авыл җәмәгатенең имана җире 365,5 дисәтинә тәшкил итә.

1920 елга кадәр авыл Казан губернасының Казан өязе Ильинский волостена керә. 1920 елдан ТАССРның Арча кантонында. 1927 елның 14 февраленнән — Воскресенский, 1927 елның 1 августыннан — Казан авыл районында, 1938 елның 4 августыннан — Юдино, 1958 елның 16 июленнән Яшел Үзән районында.

Хәзер Әйшә авыл җирлеге составына керә.

Күмәкләштерү елларында авылда “Победа” колхозы оештырыла; 1953 елдан авыл − зурайтылган “Авангард” колхозы (үзәк утары Әйшә авылында), 1960 елдан − “Юдино” нәселле кошчылык (үзәк утары Залесный поселогында), 1966 елдан “Овощевод” совхозлары (үзәк утары Әйшә авылында, 1995 елдан – күмәк предприятие, 2012 елда – “Овощевод” җаваплылыгы чикләнгән җәмгыять) составында.

Төзекләндерелгән “Хрустальный” чишмәсе бар.

1782 елда — 34 ир заты;
1859 елда — 111,
1897 елда — 181,
1908 елда — 211,
1920 елда — 254,
1926 елда — 308,
1938 елда — 297,
1949 елда — 150,
1958 елда — 234,
1970 елда — 258,
1979 елда — 307,
1989 елда — 267,
2002 елда — 186,
2010 елда — 179,
2017 елда — 234 кеше (руслар — 46%, татарлар — 26%, чуашлар — 3%).