Екатериновка

XIX йөз башында нигезләнә. Нигезләнгән вакытында мордвалар, соңрак руслар яши.

1861 елгы реформага кадәр халкы алпавыт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук читкә китеп эшләү тарала.

XIX йөз ахырында авыл җәмәгатенең имана җире 890 дисәтинә тәшкил итә.

1920 елга кадәр поселок Самара губернасының Бөгелмә өязе Александровка волостена керә. 1920 елдан – ТАССРның Бөгелмә кантонында.

1930 елның 10 августыннан – Баулы, 1935 елның 10 февраленнән – Ютазы, 1963 елның 1 февраленнән – Бөгелмә, 1965 елның 12 гыйнварыннан – Баулы, 1991 елның 6 апреленнән – Ютазы районында.

Хәзер – Димтамак авыл җирлегендә.

1931 елда поселокта «Урожай» колхозы оештырыла, 1953 елдан –Маленков исемендәге колхоз (үзәк утары – Димтамак авылы), 1958 елдан – «Правда» колхозы (үзәк утары – Димтамак авылы), 1993 елдан – «Димтамак» акционерлык җәмгыяте, 1995 елдан – «Димтамак» күмәк хуҗалыгы, 2000 елдан – «Тугай» кооперативы, 2006 елдан – «Уңыш» җаваплылыгы чикләнгән җәмгыяте эшли.

1859 елда – 380,
1889 елда – 401,
1920 елда – 106,
1926 елда – 156,
1938 елда – 211,
1949 елда – 146,
1958 елда – 115,
1970 елда – 85,
1979 елда – 36,
1989 елда – 15,
2002 елда – 9,
2010 елда – 25,
2020 елда – 24 кеше (татарлар, руслар).