Бикнарат

XVIII йөздә нигезләнә. 1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

ХХ йөз башында авылда мәчет, 3 вак-төякләр кибете эшли. Авыл җәмәгатенең имана җире 524,5 дисәтинә тәшкил итә.

1920 елга кадәр авыл Казан губернасының Краснококшайск (1919 елга кадәр – Царёвококшайск) өязе Сотнур волостена керә. 1920–1921 елларда – Мари автономияле өлкәсе составында. 1921 елның 22 сентябреннән – ТАССРның Арча кантонында. 1930 елның 10 августыннан – Дөбъяз, 1963 елның 1 февраленнән – Яшел Үзән, 1965 елның 12 гыйнварыннан – Биектау районында.

Хәзер Олы Битаман авыл җирлегендә.

1931 елда авылда “Авангард” колхозы оештырыла. 1951 елдан “Алга” колхозы (Олы Битаман, Кече Битаман, Ювас авыллары белән бергә), 1994 – 1999 елларда – “Алга” авыл хуҗалыгы кооперативлары ассоциациясе, 1999 – 2004 елларда – “Игенче” агрофирмасы” авыл хуҗалыгы җитештерү кооперативы, 2014 елдан – “Битаман” җаваплылыгы чикләнгән җәмгыяте эшли.

Халкы кырчылык һәм терлекчелек белән шөгыльләнә.

1925 елда клуб төзелә (хәзер эшләми). 2008 елга кадәр башлангыч мәктәп эшли.

Фельдшер-акушерлык пункты, “Рәйхат” мәчете (1997 елдан) бар.

Авыл янында археология истәлеге – Бикнарат туктаулыгы (бронза гасырның соңгы чоры) табыла.

Х.Әхмәдуллин (1875 – 1942) – скрипкачы, татар профессиональ халыкчан скрипка сәнгате традицияләрен дәвам иттерүчеләрнең берсе, оригиналь әсәрләр (“Аккош маршы”) авторы;

Р.З.Гарипов (1958 елда туган) – “Спартак” аяк киемнәре җитештерү Аакционерлык җәмгыяте генераль директоры (2003 – 2013 еллар);

К.Х.Ибәтуллин (1928 – 2011) – төзүче, Социалистик Хезмәт Герое, Ленин ордены кавалеры;

З.Хөснияр (1961 елда туган) – язучы-прозаик, драматург, публицист, “Салават күпере”, “Сәхнә” журналлары баш мөхәррире, ТРның атказанган сәнгать эшлеклесе, М.Җәлил исемендәге Республика бүләге, А.Алиш, Ф.Хөсни, Г.Исхакый исемендәге әдәби премияләр, ТР Журналистлар берлегенең “Бәллүр каләм” премиясе лауреаты.

1803 елда – 80,
1859 – 201,
1897 – 393,
1908 – 480,
1922 – 429,
1926 – 572,
1938 – 660,
1949 – 551,
1958 – 433,
1970 – 380,
1989 – 214,
2002 – 201,
2010 – 182,
2017 – 155 кеше (татарлар – 98,8%, руслар – 1,2%).