Төрек-Тәмте

Казан ханлыгы чорында нигез салына. Революциягә кадәрге чыганакларда Иске Йорт Пүчинкәсе, Төрек исемнәре белән дә искә алына.

XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, тегүчелек кәсепчелеге таралган була.

1859 ел мәгълүматларына караганда авылда 2 мәчет була.

XX йөз башында 2 мәчет, 2 мәдрәсә, су тегермәне, 2 вак-төякләр кибете эшли. Авыл җәмәгатенең имана җире 925 дисәтинә тәшкил итә.

1920 елга кадәр авыл Казан губернасының Лаеш өязе Пановка волостена керә. 1920 елдан ТАССРның – Лаеш, 1927 елдан Арча кантонында.

1930 елның 10 августыннан – Саба, 1935 елның 10 февраленнән – Теләче, 1959 елның 12 октябреннән – Саба, 1991 елның 4 октябреннән – Теләче районында.

Хәзер – Югары Кибәхуҗа авыл җирлегендә.

1932 елда авылда «Төрек-Баш» колхозы оештырыла, 1949 елдан авыл –Киров исем.колхозның үзәк утары (аңа шулай ук юкка чыккан. Данауровка поселогы да керә), 1964 елдан – Куйбышев исемендәге колхозда (үзәк утары – Югары Кибәхуҗа авылы), 1991 елдан «Чулпан» колхозы, 1995 елдан «Чулпан» күмәк предприятиесе (үзәк утары – Югары Кибәхуҗа авылы) эшли. Авылда шулай ук Р.Н.Кыямов крестьян-фермер хуҗалыгы бар.

Халкы башлыча үсемлекчелек һәм терлекчелек белән шөгыльләнә.

Китапханә, тулы булмаган урта мәктәп (2010–2019 елларда башлангыч мәктәп, Югары Кибәхуҗа урта мәктәбе филиалы) була.

Р.М.Низамов (1973 елда туган) – җырчы, Татарстан Республикасының халык артисты.

1782 елда – 123 ир-ат;
1859 елда – 718,
1897 елда – 930,
1908 елда – 1040,
1920 елда – 1009,
1926 елда – 772,
1938 елда – 624,
1949 елда – 539,
1958 елда – 454,
1970 елда – 392,
1979 елда – 315,
1989 елда – 196,
2002 елда – 145,
2010 елда – 113,
2020 елда – 69 кеше (татарлар).