Сәмәкәй

1735 елдан мәгълүм. Революциягә кадәрге чыганакларда Семякова, Семенклеева буларак та искә алына.

XVIII йөздә – XIX йөзнең беренче яртысында халкы асабалар һәм типтәрләр катлауларына бүленә. Бу чорда халкының төп шөгыльләре – игенчелек һәм терлекчелек.

XX йөз башында авылда мәчет, мәктәп эшли. Авыл җәмәгатенең имана җире 1808,1 дисәтинә тәшкил итә.

1920 елга кадәр авыл Уфа губернасының Минзәлә өязе Нөркәй волостена керә. 1920 елдан – ТАССРның Минзәлә, 1922 елдан – Чаллы кантонында. 1930 елның 10 августыннан – Чаллы, 1935 елның 10 февраленнән – Ворошилов, 1957 елның 29 ноябреннән – Яңа Юл, 1959 елның 12 октябреннән – Минзәлә, 1984 елның 4 июненнән Тукай районында.

Хәзер – Сәмәкәй авыл җирлеге үзәге.

1929 елда «Ленар» колхозы оештырыла (1952 елда аңа Күгәш авылы керә, үзәк утары – Сәмәкәй авылы). 1959 елда, Сәет, Оргыды авыллары кушылганнан соң, хуҗалыкның исеме «Авангард» дип үзгәртелә (үзәк утары – Сәмәкәй авылы), 1961 елдан кабат «Ленар» колхозы дип атала (үзәк утары – Сәмәкәй авылы). 1989 елда Сәет һәм Оргыды авыллары мөстәкыйль «Ирек» колхозы булып бүленеп чыгалар (үзәк утары – Сәет авылы). 1997 елдан авылда – «Ленар» авыл хуҗалыгы җитештерү кооперативы, 2005 елдант «Кама» агрофирмасы» җаваплылыгы чикләнгән җәмгыяте эшли.

Халкы башлыча үсемлекчелек һәм сөт терлекчелеге белән шөгыльләнә.

1926 елда башлангыч мәктәп ачыла, 1935 елда – җидееллык, 1952 елда – сигезьеллык, 1986 елда – урта (1995 елда яңа бина төзелә), 2004 елда тулы булмаган урта мәктәп итеп үзгәртелә. 1995 елда мәктәптә туган якны өйрәнү музее оештырыла (нигезләүчесе – Л.Р.Сәгыйтова).

Авылда балалар бакчасы (1963 елдан), мәдәният йорты, китапханә (икесе дә – 1992 елдан), фельдшер-акушерлык пункты, «Өркәнәй» мәчете (1990 елдан) бар.

Мәдәният йорты каршында «Зиләйлүк» фольклор ансамбле эшли.

Ф.Г.Хәкимова (1917–1979) –ТАССРның социаль тәэминат министры (1959–1977), Хезмәт Кызыл Байрагы ордены кавалеры;

Шаһиәхмәд әс-Симәки (1787–1837) – дин эшлеклесе, Г.Курсави шәкерте, мөселман хокукы – фикъһ буенча хезмәтләр авторы..

1795 елда – 110,
1816 елда – 117 ир-ат;
1834 елда – 373,
1859 елда – 306,
1870 елда – 799,
1897 елда – 1133,
1920 елда – 1462,
1926 елда – 1182,
1938 елда – 833,
1949 елда – 557,
1958 елда – 504,
1970 елда – 558,
1979 елда – 396,
1989 елда – 300,
2002 елда – 320,
2020 елда – 302 кеше (татарлар).