Таулы Дөреш

XVIII йөзнең беренче яртысында нигезләнә. Революциягә кадәрге чыганакларда Таулы Дөреш, Кече Дөреш буларак та искә алына.

1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук умартачылык тарала.

1870 елгы мәгълүматлар буенча авылда мәчет, мәктәп, 2 су тегермәне эшли. Авыл җәмәгатенең имана җире 656, 4 дисәтинә тәшкил итә.

1920 елга кадәр авыл Уфа губернасының Минзәлә өязе Язикәү волостена керә. 1920 елдан – ТАССРның Минзәлә, 1922 елдан – Чаллы кантонында. 1930 елның 10 августыннан – Чаллы, 1935 елның 10 февраленнән – Ворошилов, 1957 елның 29 ноябреннән – Яңа Юл, 1959 елның 12 октябреннән – Сарман, 1984 елның 4 июненнән Тукай районында.

Хәзер – Иске Дөреш авыл җирлегендә.

1929 елда «Яңалиф» колхозы оештырыла. 1955 елда хуҗалыкның исеме 19 нчы партсъезд исемендәге колхоз дип үзгәртелә. 1958 елдан – Ленин исемендәге (үзәк утары – Иске Дөреш авылы), 1960 елдан – Тукай исемендәге (үзәк утары – Иске Дөреш авылы), 1998 елдан – Тукай исемендәге җитештерү кооперативы, 2006 елдан шул ук исемдәге авыл хуҗалыгы җитештерү кооперативы. Хәзерге вакытта «Фәррахов», «Шиһапов» крестьян-фермер хуҗалыклары эшли.

Халкы башлыча үсемлекчелек һәм сөт терлекчелеге белән шөгыльләнә.

1926–1997 елларда – башлангыч мәктәп, 1950–2010 елларда клуб эшләп килә.

Авылда фельдшер-акушерлык пункты, мәчет (2007 елдан), дендропарк (җирле эколог Р.Мөхәммәдьяров башлангычында оештырыла) бар.

Авыл янында төзекләндерелгән «Рәүф чишмәсе» урнашкан.

Ф.С.Бикчурина (1935 елда туган) – туфрак белгече, биология фәннәре кандидаты;

М.Ф.Хәсәнов (1942–?) – географ, геолог, геология-минералогия фәннәре кандидаты, Көнбатыш Себер җитештерү фәнни-тикшеренү институтының төзелештә инженерлык тикшеренүләре буенча директоры (1981–1994).

1834 елда – 273,
1859 елда – 508,
1870 елда – 608,
1897 елда – 847,
1920 елда – 756,
1926 елда – 419,
1938 елда – 492,
1949 елда – 370,
1958 елда – 300,
1970 елда – 225,
1979 елда – 165,
1989 елда – 108,
2002 елда – 382,
2010 елда – 427,
2020 елда – 384 кеше (татарлар).