Рантамак

1748 елдан Токмәт (Тукмитево) авылы буларак мәгълүм. Җирле халык элек Рангазар Тамак һәм Утар атамаларын куллана.

1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек. XX йөз башында авылда мәчет, мәктәп эшли.

Авыл җәмәгатенең имана җире 503,7 дисәтинә тәшкил итә.

1920 елга кадәр авыл Уфа губернасының Минзәлә өязе Александр-Кармалы волостена керә.

1920 елдан – ТАССРның Минзәлә, 1922 елдан – Чаллы кантонында. 1930 елның 10 августыннан – Сарман районында.

Хәзер – Рангазар авыл җирлегендә.

1930 елда «Өч чишмә» колхозы оештырыла. 1958 елда Балтамак авылы колхозы белән «За мир» хуҗалыгына берләштерелә, 1960 елда «Җиңүче» колхозына кушыла (үзәк утары – Рангазар авылы).

1994 елдан авылда – «Җиңүче», 1995 елдан – «Өч чишмә», 1999–2002 елларда – «Җиңүче» күмәк предприятиеләре, 2003–2005 елларда – «Җиңүче» авыл хуҗалыгы җитештерү кооперативы эшли.

Халкы башлыча кырчылык һәм сөт терлекчелеге белән шөгыльләнә.

2013 елга кадәр башлангыч мәктәп эшләп килә.

Авылда китапханә (1952 елдан), мәдәният йорты (икесе дә 2016 елдан – күп функцияле үзәк бинасында), модуль фельдшер-акушерлык пункты (2017 елдан), «Мирзанур» мәчете (2007 елдан), авыл янында 2007 елда «Җәлилнефть» нефть-газ чыгару идарәсе чыгымнарына төзекләндерелгән «Рантамак» чишмәсе бар.

Мәдәният йорты каршында «Чишмә» вокаль ансамбле (2005 елдан), «Саф җил» фольклор, балаларның «Энҗе бөртекләре» хореография (икесе дә – 2007 елдан), «Кояшкай» вокаль, «Заман» театр коллективлары эшли.

Авыл янында археология истәлеге – Рантамак авыллыгы (Бахмутино культурасы) табыла.

1870 елда – 156,
1920 елда – 342,
1926 елда – 255,
1938 елда – 299,
1949 елда – 334,
1958 елда – 367,
1970 елда – 423,
1979 елда – 313,
1989 елда – 188,
2002 елда – 184,
2010 елда – 213,
2021 елда – 150 кеше (татарлар).