Наратасты

1719–1722 еллардан мәгълүм. Кайбер хәбәрләр буенча, XVII йөздә Мамадыш авылыннан чыгучылар тарафыннан нигезләнә.

1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук чана ясау тарала. 1870 елгы мәгълүматлар буенча, авылда су тегермәне эшли.

XX йөз башында авыл җәмәгатенең имана җире 559,9 дисәтинә тәшкил итә.

1920 елга кадәр авыл Уфа губернасының Минзәлә өязе Язикәү волостена керә. 1920 елдан – ТАССРның Минзәлә, 1922 елдан – Чаллы кантонында. 1930 елның 10 августыннан – Сарман районында.

Хәзер – Чукмарлы авыл җирлегендә.

1930 елда «Ленин призывы» колхозы оештырыла. 1951 елда В.И.Ленин исем. колхозга кушыла (үзәк утары – Чукмарлы авылы), 1963 елда хуҗалыкның исеме «Чулпан» колхозы дип үзгәртелә. 1994–2002 елларда авылда –«Чулпан» күмәк предприятиесе, 2003 елдан – «Мәрданов» крестян-фермер хуҗалыгы, 2004–2005 елларда «Чулпан» авыл хуҗалыгы җитештерү кооперативы эшли. Хәзерге вакытта 2 крестян-фермер хуҗалыгы бар.

Халкы башлыча кырчылык һәм сөт терлекчелеге белән шөгыльләнә.

2006 елга кадәр башлангыч мәктәп эшли.

1870 елда – 279,
1913 елда – 606,
1920 елда – 563,
1926 елда – 439,
1938 елда – 238,
1949 елда – 169,
1958 елда – 188,
1970 елда – 190,
1979 елда – 145,
1989 елда – 72,
2002 елда – 69,
2010 елда – 49,
2021 елда – 71 кеше (керәшен татарлар).