Иске Мичән

1613 елдан Мисен буларак мәгълүм. XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда мәчет һәм мәктәп эшли. Авыл җәмәгатенең имана җире 833,5 дисәтинә тәшкил итә.

1920 елга кадәр авыл Казан губернасының Мамадыш өязе Яңа Чүриле волостена керә.

1920 елдан – ТАССРның Мамадыш, 1921 елдан – Арча кантонында. 1930 елның 10 августыннан – Саба, 1944 елның 19 февраленнән – Чүриле, 1956 елның 14 маеннан – Саба районында.

Хәзер – Мичән авыл җирлеге үзәге.

Күмәкләштерү елларында «Кызыл Йолдыз-I» колхозы оештырыла (беренче рәисе – Х.Хуҗиәхмәтов). 1930 елда хуҗалыкның исеме «Искра» колхозы дип үзгәртелә. 1959 елдан авылда – Тукай исем. колхоз (авылда үзәк утар урнаша; хуҗалыкка шулай ук Бакшанды, Керәнле, Яңа Мичән авыллары керә), 2000 елдан шул ук исемдәге күмәк предприятие, 2003 елдан – крестьян-фермер хуҗалыгы, 2008 елдан «Саба» җаваплылыгы чикләнгән җәмгыятенең «Мичән» бүлекчәсе эшли.

Халкы башлыча кырчылык һәм терлекчелек белән шөгыльләнә.

1924 елда башлангыч мәктәп ачыла, 1986 елда – урта, соңрак тулы булмаган урта мәктәп итеп үзгәртелә.

Авылда мәдәният йорты, «Таң» балалар бакчасы (1986 елдан), фельдшер-акушерлык пункты, «Габдулла» мәчете (1997 елдан) бар.

Авыл янында археология истәлекләре – Мәртен авыллыгы (Алтын Урда чоры болгар ядкәре), Иске Мичән табылдыгы (гомумболгар ядкәре), эпиграфика истәлеге – кабер ташы (фаразланганча, XV йөз) ачыклана.

1782 елда – 96 ир-ат;
1859 елда – 310,
1897 елда – 442,
1908 елда – 568,
1920 елда – 589,
1926 елда – 526,
1938 елда – 472,
1949 елда – 381,
1970 елда – 367,
1979 елда – 287,
1989 елда – 247,
2002 елда – 244,
2010 елда – 251,
2020 елда – 247 кеше (татарлар).