Кече Шыңар

Казан ханлыгы чорында нигезләнә. XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук баш киемнәре тегү тарала.

XX йөз башында авылда мәчет, мәдрәсә, су тегермәне, 4 вак-төякләр кибете эшли. Авыл җәмәгатенең имана җире 1159 дисәтинә тәшкил итә.

1920 елга кадәр авыл Казан губернасының Лаеш өязе Олы Кибәхуҗа волостена керә.

1920 елдан – ТАССРның Лаеш кантонында. 1930 елның 10 августыннан – Саба, 1944 елның 19 февраленнән – Чүриле, 1956 елның 14 маеннан – Саба районында.

Хәзер – Олы Шыңар авыл җирлегендә.

1931 елда К.Маркс исем. колхоз оештырыла (беренче рәисе – Ш.Гарипов). 1955 елда «Байкал» колхозы (үзәк утары – Олы Шыңар авылы) белән бергә Сталин исем. колхозга берләштерелә (үзәк утары – Олы Шыңар авылы). 1959 елдан авылда – «Авангард» колхозы эшли (үзәк утары – Олы Шыңар авылы), 1994 елдан – шул ук исемдәге күмәк предприятие, 2003 елдан – «Шыңар» крестьян-фермер хуҗалыгы, 2007 елдан – «Туган як» ачык акционерлык җәмгыяте, 2010 елдан шул ук исемдәге җаваплылыгы чикләнгән җәмгыяте.

Халкы башлыча үсемлекчелек һәм терлекчелек белән шөгыльләнә.

Авылда башлангыч мәктәп (1934 елдан), мәдәният йорты (1936 елдан – клуб буларак, 1985 елдан – яңа бинада), китапханә (1936 елдан – уку өе буларак, 1965 елдан – яңа бинада), «Котдус» мәчете (2005 елдан) бар.

Мәдәният йорты каршында «Нур» театр коллективы (1960 елдан, 2007 елдан – халык театры, нигезләүчесе – Г.А.Рәбгетдинова), «Сөмбел» хореография ансамбле (1960 елдан, 1994 елдан – халык ансамбле, нигезләүчесе – А.К.Билалова) эшли.

Авылда, шул исәптән Г.Тимершина утарында эпиграфика истәлекләре – Казан ханлыгы чорына нисбәтле 2 кабер ташы табыла.

А.Ә.Ахунҗанов (1937 елда туган) – балалар хирургы, уролог, медицина фәннәре докторы, профессор, ТАССРның, РФнең атказанган табибы, СССРның атказанган уйлап табучысы, Татарстан Республикасының фән һәм техника өлкәсендәге Дәүләт бүләге лауреаты;

Х.З.Ахунҗанов (1918–1978) – медицина фәннәре хирург, кандидаты, Казан ГИДУВы ректоры (1962–1968), Хезмәт Кызыл Байрагы ордены кавалеры.

1782 елда – 116 ир-ат;
1859 елда – 575,
1897 елда – 713,
1908 елда – 939,
1920 елда – 864,
1926 елда – 724,
1938 елда – 805,
1949 елда – 702,
1970 елда – 611,
1979 елда – 548,
1989 елда – 424,
2002 елда – 403,
2010 елда – 377,
2020 елда – 336 кеше (татарлар).