Түбән Тегермәнлек

1565–1567 елларга кадәр нигезләнә. XVIII йөздә – XIX йөзнең беренче яртысында халкы дәүләт крәстияннары катлавына керә. Бу чорда халкының төп шөгыльләре – игенчелек һәм терлекчелек, шулай ук сатуга агач савыт-саба, ат дирбиясе, арбалар, чаналар ясау тарала.

XX йөз башында мәчет, мәктәп, 11 вак-төякләр кибете эшли. Авыл җәмәгатенең имана җире 1745 дисәтинә тәшкил итә.

1920 елга кадәр авыл Казан губернасының Лаеш өязе Уракчы волостена керә. 1920 елдан – ТАССРның Лаеш кантонында. 1927 елның 14 февраленнән – Балык Бистәсе, 1935 елның 10 февраленнән – Кызыл Йолдыз, 1959 елның 26 мартыннан – Балык Бистәсе, 1963 елның 1 февраленнән – Мамадыш, 1965 елның 12 гыйнварыннан – Балык Бистәсе районында.

Хәзер – Түбән Тегермәнлек авыл җирлегендә.

1931 К.Маркс исемендәге колхоз оештырыла. 1963 елгы мәгълүматлар буенча, авылда Г.Тукай исемендәге колхозның үзәк утары урнаша (хуҗалык кырчылык, сөт терлекчелеге, дуңгыз асрау белән шөгыльләнә; соңрак, 1966, 1992 елгы мәгълүматлар буенча, үзәк утар Югары Тегермәнлек авылында урнаша). 1994 елдан авылда «Түбән Тегермәнлек» авыл хуҗалыгы җитештерү кооперативы эшли.

1928–1997 – башлангыч, 1997 елдан – урта, 2011 елдан тулы булмаган урта мәктәп эшли (бинасы 1997 елда төзелә).

«Шатлык» балалар бакчасы (мәктәп бинасында), клуб (мәчет бинасында), китапханә, фельдшер-акушерлык пункты, «Габдрахман» мәчете (2002 елдан) бар.

Б.Г.Шәвәлиев (1925–1944) – икенче дәрәҗә Ватан сугышы ордены кавалеры, Александра Матросов батырлыгын кабатлый.

1859 елда – 713,
1897 елда – 1672,
1908 елда – 1375,
1920 елда – 1311,
1926 елда – 784,
1938 елда – 1377,
1949 елда – 979,
1958 елда – 860,
1970 елда – 1168,
1989 елда – 599,
2002 елда – 556,
2010 елда – 495,
2020 елда – 410 кеше (татарлар – 98%).