Яңа Иглай

1835 елда нигезләнә. 1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында мәктәп, мәчет эшли. Авыл җәмәгатенең имана җире (Иске Иглай авылы белән бергә) 2022 дисәтинә тәшкил итә.

1928 елга кадәр авыл Самара губернасының Мәләкәс өязе Шламка волостена керә. 1928 елдан – ТАССРның Чистай кантоны Иске Чаллы волостенда. 1930 елның 10 августыннан – Октябрь, 1997 елның 10 декабреннән – Нурлат районында.

Хәзер – Яңа Иглай авыл җирлеге үзәге.

1930 елда авылда «Красный ударник» колхозы оештырыла. 1963 елда – «Звезда» колхозы (авылда үзәк утар урнаша; шулай ук Яктыкүл, Иске Иглай авыллары, Некрасовка, Тукай поселоклары хуҗалыклары керә), 1970 елда «Рассвет» совхозы (авылда үзәк утар урнаша; шулай ук Яктыкүл, Иске Иглай авыллары, Некрасовка, Тукай поселоклары хуҗалыклары керә) итеп үзгәртелә. 1995 елдан – «Рассвет» крестьян-фермер хуҗалыклары ассоциациясе, 1997 елдан – «Нурлат» агрофирмасы, 2000 елдан – «Рассвет» авыл хуҗалыгы кооперативы, 2006 елдан – «Таң», 2010 елдан «Южная» агрофирмасы» җаваплылыгы чикләнгән җәмгыятьләре эшли.

Халкы башлыча үсемлекчелек, ит-сөт терлекчелеге белән шөгыльләнә.

1918 елда башлангыч мәктәп ачыла, ул 1937 елда – җидееллык, 1985 елда урта мәктәп (1979 елда яңа бина төзелә) итеп үзгәртелә. 1971 елда мәктәп каршында туган якны өйрәнү музее оештырыла (оештыручысы – Т.Ш.Гобәйдуллин, экспозициядә 3 меңнән артык экспонат).

Мәдәният йорты, китапханә (1930 елда уку йорты буларак ачыла, 1993 елдан мәдәният йорты бинасында), балалар бакчасы (1986 елдан), күпфункцияле үзәк, фельдшер-акушерлык пункты, мәчет (2005 елдан); авыл янында төзекләндерелгән «Иглай бабай чишмәсе» (инвесторы – «Татнефть-ТрансСервисНурлат» җаваплылыгы чикләнгән җәмгыяте) бар.

Мәдәният йорты каршында «Шатлык» бию коллективы (2009 елдан, оештыручысы – З.Ш.Хөсәенова) эшли.

Г.С.Хөсәенов (1937–2010) – спортчы, футболчы, СССРның атказанган спорт остасы, халыкара класслы спорт остасы (Нурлат шәһәренең «Спортивный» паркында аңа һәйкәл куелган).

1926 елда – 813,
1938 елда – 963,
1949 елда – 824,
1958 елда – 794,
1970 елда – 995,
1979 елда – 793,
1989 елда – 948,
2002 елда – 645,
2010 елда – 554,
2021 елда – 444 кеше (татарлар).