Байданкино

XVIII йөздә нигезләнә. Революциягә кадәрге чыганакларда Чермыш исеме белән дә искә алына.

1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек, терлекчелек һәм умартачылык.

XX йөз башында җил тегермәне эшли. Авыл җәмәгатенең имана җире 1046,5 дисәтинә тәшкил итә.

1920 елга кадәр авыл Уфа губернасының Минзәлә өязе Сухарево волостена керә. 1920 елдан – ТАССРның Минзәлә, 1922 елдан – Чаллы кантонында.

1930 елның 10 августыннан – Ширәмәт, 1963 елның 1 февраленнән – Чаллы, 1965 елның 12 гыйнварыннан – Түбән Кама районында.

Хәзер – Каенлы авыл җирлегендә.

1930 елларда авылда “Венера” колхозы оештырыла. 1959 елдан берләштерелгән “Красный Зай” колхозы (үзәк утары – Байгол авылы), 1970 елда совхоз (үзәк утары – Каенлы авылы) итеп үзгәртелә.

1993–1995 елларда "Зәй" күмәк предприятиесе эшли. 1996–2007 елларда “Зәй” җаваплылыгы чикләнгән ширкәте, 2018 елдан “Орсис-Агро” җаваплылыгы чикләнгән җәмгыяте.

Халкы башлыча үсемлекчелек, сөт терлекчелеге белән шөгыльләнә.

1859 елда – 230,
1870 елда – 334,
1897 елда – 563,
1920 елда – 838,
1926 елда – 672,
1938 елда – 626,
1949 елда – 528,
1958 елда – 354,
1970 елда – 311,
1979 елда – 226,
1989 елда – 104,
2002 елда – 76,
2010 елда – 94,
2022 елда – 118 кеше (руслар, татарлар).