Иске Смыловка

1712–1713 еллардан мәгълүм. Революциягә кадәрге чыганакларда Старо-Смыловка исеме белән телгә алына, җирле халык “Заводьишко” исемен дә куллана.

1860 елларга кадәр халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек, шулай ук умартачылык, итек тегү, чабата үрү һәм чана ясау кәсепчелеге тарала.

XIX йөздә көндә кирәкле товарлар җитештерү заводы (савыт-саба, кием-салым) эшли. 1870 ел мәгълүматлары буенча, авылда су тегермәне, XX йөз башында чиркәү-приход мәктәбе була.

Авыл җәмәгатенең имана җире 631,4 дисәтинә тәшкил итә.

1920 елга кадәр Уфа губернасының Минзәлә өязе Яңа Шуган волостена керә. 1920 елдан ТАССРның Минзәлә кантонында. 1930 елның 10 августыннан – Мөслим, 1963 елның 1 февраленнән – Сарман, 1965 елның 12 гыйнварыннан Мөслим районында.

Хәзер Шуган авыл җирлеге составында.

1929 елда авылда “Малиновка” колхозы ( беренче рәисе – П.Е.Волгин) оештырыла, 1950 елда – берләштерелгән “Новая жизнь”, 1961 елда – “Новый путь”, 1964 елда “Маяк” колхозлары составына керә. 1981 елда “Нектар” совхозы составында аерылып чыга. Хәзер крәстиян-фермер хуҗалыклары эшли.

Халкы кырчылык белән шөгыльләнә.

1949 елда авылда җидееллык мәктәп ачыла, 1960 елларда ябыла.

1870 елда – 203,
1897 елда – 563,
1920 елда – 338,
1926 елда – 280,
1938 елда – 277,
1949 елда – 205,
1958 елда – 109,
1970 елда – 107,
1979 елда – 67,
1989 елда – 45,
2002 елда – 42,
2010 елда – 20,
2017 елда – 22 кеше (руслар).