Түбән Шүләңгер

1680 елдан буларак мәгълүм. XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда мәчет, тегермән, ярма яргыч, 2 вак-төякләр кибете эшли. Бу чорда авыл җәмәгатенең имана җире 1056,6 дисәтинә тәшкил итә.

1905 елдан соң авылда мулла башлангычы белән мәктәп ачыла (махсус бина төзелә).

1920 елга кадәр Казан губернасының Мамадыш өязе Җөри волостена керә. 1920 елдан ТАССРның Мамадыш кантонында. 1930 елның 10 августыннан – Тәкәнеш, 1932 елның 1 гыйнварыннан – Мамадыш, 1935 елның 10 февраленнән – Тәкәнеш, 1963 елның 1 февраленнән Мамадыш районында.

Хәзер Түбән Шүләңгер авыл җирлеге составында.

1929 елда авылда “Маркс-Ленин” артеле оештырыла. 1959 елда Ленин исемендәге колхозга берләштерелә.

Халкы кырчылык, ит-сөт терлекчелеге белән шөгыльләнә.

1918 елда башлангыч мәктәп ачыла, 1938 елда – җидееллык, соңрак кабат башлангыч мәктәп итеп үзгәртелә (хәзер эшләми).

Авылда мәдәният йорты (1965 елдан), китапханә (1939 елдан), фельдшер-акушерлык пункты (1956 елдан), “Ибраһим” мәчете (1998 елдан) бар.

Г.В.Ибраһимова (1909–1984) – драма актрисасы, ТАССР ның халык артисты, РСФСР ның атказанган артисты.

1782 елда — 86 ир-ат;
1859 елда — 503,
1897 елда — 839,
1908 елда — 936,
1920 елда — 899,
1926 елда — 819,
1949 елда — 457,
1958 елда — 391,
1970 елда — 387,
1979 елда — 271,
1989 елда — 216,
2002 елда — 223,
2010 елда — 187,
2017 елда — 159 кеше (татарлар).