Куакбаш

1730 елларда нигез салына.

1860 елларга кадәр халкы типтәрләр һәм дәүләт крәстияннәре катлавына керә. Бу чорда халкының төп шөгыле – игенчелек, терлекчелек, көл җыеп сату.

1864 елгы мәгълүматлар буенча, авылда мәчет, мәдрәсә (1822–1823 елларда Г.Утыз Имәни тарафыннан ачыла) була.

XX йөз башында авылда волость идарәсе, земство станциясе урнаша; 3 мәчет, 3 су тегермәне була; һәр сишәмбе саен базар эшли. Авыл җәмәгатенең имана җире 3460 дисәтинә тәшкил итә.

1920 елга кадәр Самара губернасының Бөгелмә өязе Кузайкино волосте үзәге була. 1920 елдан ТАССРның Бөгелмә кантонында. 1930 елның 10 августыннан – Шөгер, 1959 елның 16 октябреннән Лениногорск районында.

Хәзер Куакбаш авыл җирлеге үзәге.

1933 еллар башында авылда К.Маркс исемендәге колхоз (беренче рәисе – М.Гайсин) оештырыла, 1958 елда аның составына “Кызыл Йолдыз” колхозы (Чүте авылы) керә, 1960 елда аңа “Канаш” колхозы (Сходнево-Чертанла авылы) берләштерелә, 1994 елдан – К.Маркс исемендәге күмәк предприятие, 2004 елдан – Ганиев крәстиян-фермер хуҗалыгы, 2006 елдан – “Маркс” җаваплылыгы чикләнгән җәмгыяте.

Халкы кырчылык, ит-сөт терлекчелеге белән шөгыльләнә.

1928 елда авылда башлангыч мәктәп ачыла, 1934 елда – бишьеллык, 1937 елда – җидееллык, 1961 елда – сигезьеллык, 1986 елда – урта, 2011 елда – тулы булмаган урта мәктәп итеп үзгәртелә.

Авылда мәдәният йорты һәм китапханә (икесе дә – 1955 елдан, 1972 елдан яңа бинада), фельдшер-акушерлык пункты (1983 елдан, 2016 елдан яңа бинада), балалар бакчасы (1987 елдан), мәчет (1991елдан) бар.

Мәдәният йорты каршында “Яшьлек”, Сәйлән” – хореография, “Дулкын”, “Бәхетле балачак” – вокаль, “Сәхнә” театр (барысы да – 1996 елдан) коллективлары эшли.

Авыл янында төзекләндерелгән чишмәләр бар: “Дегет базы”, “Кадермәт”, “Кантор коесы”, “Сарбаш”, “Салкын кое”.

Ә.З.Шәйхетдинов (1940–2018) – шагыйрь, Ш.Бикчурин исемендәге бүләк лауреаты.

1859 елда – 1159,
1889 елда – 1662,
1900 елда – 1926,
1910 елда – 2178,
1926 елда – 1764,
1938 елда – 1444,
1949 елда – 1168,
1958 елда – 1068,
1970 елда – 1237,
1979 елда – 1032,
1989 елда – 879,
2002 елда – 883,
2010 елда – 817,
2017 елда – 846 кеше (татарлар).