Ташлы Елга

XVII йөзнең икенче яртысында нигез салына.

XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда мәчет, мәктәп (1908 елдан, беренче укытучысы, имам хатиб һәм мөдәррисе – Х.Төхбәтуллин), 3 вак-төякләр кибете эшли.

Авыл җәмәгатенең имана җире 989,4 дисәтинә тәшкил итә.

1920 елга кадәр Казан губернасының Мамадыш өязе Лыябаш-Келәүш волостена керә. 1920 елдан ТАССРның Мамадыш кантонында. 1930 елның 10 августыннан – Кукмара, 1935 елның 10 февраленнән – Тәкәнеш, 1963 елның 1 февраленнән – Саба, 1965 елның 12 гыйнварыннан Кукмара районында.

Хәзер Кәркәүч авыл җирлеге составында.

1934 елда авылда “Кызыл сукачы” колхозы оештырыла, 1955 елдан – Тукай исемендәге колхоз (Кәркәүч авылы), 1962 елдан – “Ударник” колхозы (Кәркәүч авылы), 1993 елдан – Тукай исемендәге күмәк авыл хуҗалыгы предприятиесе (2003 елдан – “Тукай” авыл хуҗалыгы җитештерү кооперативы, 2006 елдан – “Тукай” агрофирмасы” җаваплылыгы чикләнгән җәмгыяте), 2018 елдан “Уңыш” җаваплылыгы чикләнгән җәмгыяте составында.

Халкы күбесенчә “Уңыш” җаваплылыгы чикләнгән җәмгыятендә, крәстиян-фермер хуҗалыкларында эшли, сөт терлекчелеге белән шөгыльләнә.

1931 елда башлангыч мәктәп ачыла (1975 елда яңа бина төзелә).

Авылда шулай ук клуб (1969 елдан), балалар бакчасы (1986 елдан), фельдшер-акушерлык пункты (2015 елдан яңа бинада), мәчет (1994 елдан) бар.

Төзекләндерелгән чишмәләр бар: “Салкын чишмә” һәм “Афзал чишмәсе”.

Б.Г.Хәсәнов (1962 елда туган) – запастагы медицина хезмәте полковнигы.

1782 елда – 45 ир-ат;
1859 елда – 482,
1897 елда – 764,
1908 елда – 844,
1920 елда – 951,
1926 елда – 992,
1938 елда – 400,
1949 елда – 334,
1958 елда – 550,
1970 елда – 570,
1979 елда – 445,
1989 елда – 374,
2002 елда – 379,
2010 елда – 390,
2017 елда – 368 кеше (татарлар).