Яңа Каенсар

XVIII йөз ахыры – XIX йөз башында Иске Каенсар авылыннан күченүчеләр тарафыннан нигез салына.

1860 елларга кадәр халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда Изге Гурий борадәрлеге мәктәбе (1898 елда ачыла, 1909 елда земство мәктәбе итеп үзгәртелә) эшли.

Авыл җәмәгатенең имана җире 726,1 дисәтинә тәшкил итә.

1920 елга кадәр Казан губернасының Мамадыш өязе Петропавел волостена керә. 1930 елның 10 августыннан – Кукмара, 1935 елның 10 февраленнән – Тәкәнеш, 1963 елның 1 февраленнән – Саба, 1965 елның 12 гыйнварыннан Кукмара районында.

Хәзер Важашур авыл җирлеге составында.

1930 елда авылда “Выль Султан” колхозы оештырыла, 1956 елдан – Киров исемендәге колхоз (Важашур авылы), 1962 елдан – “Гигант” колхозы (Пүчинкә-Сутер авылы, соңрак үзәк утары Важашур авылында) (1993 елдан – “Гигант” күмәк авыл хуҗалыгы предприятиесе, 2003 елдан – “Гигант” авыл хуҗалыгы җитештерү кооперативы), 2006 елдан – “Кукмара азык-төлек корпорациясе” җаваплылыгы чикләнгән җәмгыяте, 2008 елдан – “Тукай” агрофирмасы” җаваплылыгы чикләнгән җәмгыяте, 2018 елдан “Уңыш” җаваплылыгы чикләнгән җәмгыяте составында.

Халкы кырчылык, нәселле терлек үрчетү белән шөгыльләнә.

Авылда фельдшер-акушерлык пункты эшли.

Г.Г.Әхмәтов (1960 елда туган) – “Инвожо” удмурт халык фольклор ансамбле җитәкчесе (1993 елдан), ТРның атказанган мәдәният хезмәткәре;

А.К.Баймәтов (1938–2016) – психолог, педагог, психология фәннәре кандидаты, доцент;

Г.С.Сабитов (1915–1993) – шагыйрь, тәрҗемәче, СССР Язучылар берлеге әгъзасы, Удмурт Республикасының атказанган мәдәният хезмәткәре;

1859 елда – 207,
1897 елда – 367,
1908 елда – 420,
1920 елда – 450,
1926 елда – 461,
1949 елда – 476,
1958 елда – 404,
1970 елда – 474,
1979 елда – 392,
1989 елда – 282,
2002 елда – 245,
2010 елда – 225,
2017 елда – 214 кеше (удмуртлар).