Иске Юраш

1666 елдан Юбраш авылы буларак билгеле.

XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек, терлекчелек.

1842 елда мәдрәсә ачыла. XX йөз башында 2 мәчет, су тегермәне була.

Авыл җәмәгатенең имана җире 3124,9 дисәтинә тәшкил итә.

1920 елга кадәр Вятка губернасының Алабуга өязе Чиркәс волостенда, 1920 елдан ТАССРның – Мамадыш, 1921 елдан – Алабуга, 1928 елдан Чаллы кантонында.

1930 елның 10 августыннан – Алабуга, 1944 елның 19 февраленнән – Костенеево, 1944 елның 8 июненнән – Морт, 1954 елның 19 ноябреннән Алабуга районында.

Хәзер Иске Юраш авыл җирлеге үзәге.

1929 елда авылда Ленин исемендәге колхоз оештырыла, 1931 елда – “Якты юл”, соңрак – Сталин исемендәге колхоз. 1960 елдан соң – Ленин исемендәге колхоз, 1995 елда “Юраш” җитештерү авыл хуҗалыгы кооперативы итеп үзгәртелә. 2000 елдан “Юраш” авыл хуҗалыгы җитештерү кооперативы.

Халкы күбесенчә “Яңа Юраш” агрофирмасы” ябык акционерлык җәмгыятендә эшли, кырчылык, ит-сөт терлекчелеге белән шөгыльләнә.

Авыл үсешенә Ленин исемендәге колхоз рәисе (1958–1983 елларда) М.М.Мулләхмәтов зур өлеш кертә.

1950 еллар уртасына кадәр Түбәнге урам мәчетендә участок хастаханәсе, аннары мәктәп урнаша; Югары урам мәчете бинасы 1952 елда сүтелә һәм Морт авылынаа күчерелә.

1917 елда – авылда башлангыч мәктәп, 1923–1930 елларда – крәстиян яшьләр мәктәбе, 1965 елда – урта мәктәп (мәчет бинасында урнаша, 1982 елда яңа бина төзелә) ачыла.

1985 елдан мәктәптә төбәк тарихын өйрәнү музее эшли (оештыручылары – Х.Гыйззәтуллин, С.Г.Шакирова).

Авылда балалар бакчасы (1981 елдан), мәдәният йорты һәм китапханә (бинасы 1973 елда төзелә), мәчет (1993 елдан), фельдшер-акушерлык пункты (2012 елда яңа бина төзелә) бар.

1859 елда – 1021,
1887 елда – 1510,
1905 елда – 1886,
1920 елда – 2115,
1926 елда – 1845,
1938 елда – 1372,
1949 елда – 938,
1958 елда – 780,
1970 елда – 832,
1979 елда – 712,
1989 елда – 597,
2002 елда – 617,
2010 елда – 591,
2017 елда – 566 кеше (татарлар – 96%).