Ибраһимов Рәшит Габдрахман улы

1927 елның 28 июлендә Ульянов өлкәсенең Богдашкино, хәзерге Чынлы районы Кәшә авылында туа.

Богырыслан гражданнар авиациясе училищесен тәмамлый (1953). 1953–1986 елларда Казан берләштерелгән авиация отрядында эшли: По-2, Ан-2, Ли-2 самолётлары очучысы, Ил-14, Ту-124 корабльләре командиры.

Авиация тарихына караган, очучы профессиясенең романтикасын чагылдырган «Көмеш канатлар» (1971), «Татарстан канатлары» («Крылья Татарстана», 1985), «Алтын йолдызлы лачын» (1987), «Көмеш канатлар – зәңгәр хыяллар» (1989), «Ерак илләргә сәяхәт» (1990), «Канатлыга – зәңгәр биеклек» (1995), «Очар вакыт» («Время летать», 2003), «Бөркетләр кыядан курыкмый» (2008), балалар өчен «Кечкенә «тулар» эпопеясы» («Эпопея маленьких «тушек» («Казань» журналы, 1999, №3–4) исемле хикәяләр, шулай ук «Туган авылым тугайлары» исемле шигъри җыентыклар (2008) авторы. Ибраһимовның күп әсәрләре автобиографик характерда.

ТАССР ЮС Президиумының Мактау грамотасы белән бүләкләнә.

Хәмитов М. Көмеш канатлар // Казан утлары. 1972. № 1;

Әхмәтсафа Ш. Рәшит Ибраһимовка – 70 яшь // Казан утлары. 1997. № 7.