Соболев Николай Леонтьевич

1904 елның 19 декабре, Вильно шәһәре, хәзер Литва Республикасының Вильнюс шәһәре — 1957 елның 2 феврале, Зеленодольск шәһәре.

Казанда фабрика-кухня директоры булып эшли.

1926–1929 елларда һәм 1942 елдан Кызыл Армия сафларында. 1942 елның мартыннан Бөек Ватан сугышы фронтларында, 57 нче танк бригадасының (60 нчы армиянең 7 нче механикалаштырылган корпусы) танкка ата торган мылтык взводы командиры. Үзәк фронт гаскәрләре составында Сулъяк яр Украинаны азат итүдә катнаша (1943). Домантово авылы (Украина ССР, Киев өлкәсенең Чернобыль районы) янында Днепрны кичкәндә батырлык күрсәтә: 1943 елның 25 сентябрендә, сафтан чыккан рота командирын алыштырып, ротаның уңъяк ярга кичүен оештыра; плацдармны киңәйтү өчен барган бәрелештә дошманның 2 танкын юк итә, контрһөҗүмнәрне кире кайтаруда катнаша.

Авыру сәбәпле, 1943 елда демобилизацияләнә. Яр буе Морквашы авылында (Югары Ослан районы) пионерлагерь директоры булып эшли, 1951 елда Васильево поселогына (Зеленодольск районы) күчә.

Ленин ордены, медальләр белән бүләкләнә.

Батырлар китабы — Книга Героев. Казан, 2000.

Автор —  М.З.Хәбибуллин