Кочнев Иван Егорович

1921 елның 15 сентябре, Чистай кантоны, хәзер Алексеев районы Николаевский Баран авылы — 1958 елның 8 феврале, шунда ук.

Туган авылында колхозда тракторчы булып эшли.

1941 елның апреленнән Кызыл Армия сафларында.

1941 елның сентябреннән Бөек Ватан сугышы фронтларында, 995 нче укчы полкта орудие командиры (2 нче гвардия армиясенең 263 нче укчы дивизиясе). Дон, Сталинград, Көньяк, 1 нче Балтыйк буе һәм 3 нче Белоруссия фронтлары гаскәрләре составында Сталинград сугышында (1942–43), Донбасс, Мелитополь (икесе дә — 1943), Шяуляй, Мемель (икесе дә — 1944) һәм Көнчыгыш Пруссия (1945) һөҗүм операцияләрендә катнаша.

1944 елның 16 — 19 августында Балтыйк буен азат итү сугышларында батырлык күрсәтә: Литва ССР территориясендә барган аяусыз сугыш барышында Кочнев расчёт составында туп уты белән дошманның 4 танкын, штурмлау тубын, 5 бронетранспортёрын һ.б. хәрби техникасын сафтан чыгара. Демобилизацияләнгәннән соң, 1958 елда туган авылында авыл советы рәисе булып эшли.

Ленин ордены, 2 нче һәм 3 нче дәрәҗә Дан ордены һәм медальләр белән бүләкләнә.

Батырлар китабы — Книга Героев. К., 2000;

Ханин Л. Герои Советского Союза — сыны Татарии. К., 1963;

Герои Советского Союза — наши земляки. К., 1984. Кн. 2;

Герои Советского Союза: Краткий биогр. словарь. М., 1987. Т. 1.

Автор — М.З.Хәбибуллин