Кыямов Дәүли Кыям улы

1923 елның 10 мае, Ульянов өлкәсенең Чардаклы районы Поповка авылы —2004 елның 29 июне, шунда ук.

Туган авылында колхозда эшли.

1942 елның февраленнән Кызыл Армия сафларында. 1942 елның апреленнән Бөек Ватан сугышы фронтларында, 1257 нче укчы полкның элемтә ротасы өлкән телефонисты (3 нче удар армиянең 379 нчы укчы дивизиясе); 901 нче укчы полкның элемтә ротасы отделение командиры (59 нчы армиянең 245 нче укчы дивизиясе). Калинин, 2 нче Балтыйк буе һәм 1 нче Украина фронтлары гаскәрләре составында Великие Луки (1942), Невельск (1943), Мадона (1944) һәм Түбән Силезия (1945) һөҗүм операцияләрендә катнаша.

1944 елның 10–11 мартында Норкино авылы (Псков өлкәсе Пустошкинский районы) янындагы сугышта (13 өзелгән линияне тоташтыра, полк штабы белән ныклы элемтәне тәэмин итә; каты яралана, әмма сугыш кырын ташламый); 1944 елның августында Айвиексте елгасын кичеп, Ляудона торак пунктыннан 10 км төньяк-көнчыгыштарак (Латвия ССР, Мадона районы) булган сугышта (10 өзелгән линияне тоташтыра, яралы хәлендә укчы подразделение белән бергә полк командиры өчен элемтә урнаштыруны оештыра); 1945 елның 14 февралендә Краков шәһәре (Польша) янында дошман оборонасын өзгәндә (дошман уты астында 20 дән артык өзелгән элемтә линиясен төзәтә) батырлык күрсәтә.

1945 елда демобилизацияләнә. Туган авылында яши, комбайнчы, трактор бригадасы бригадиры булып эшли.

1 нче дәрәҗә Ватан сугышы, «Почёт билгесе» орденнары һәм медальләр белән бүләкләнә.

Паповка авылында Кыямовка һәйкәл куела.

Рощин И.И. Солдатская слава. М., 1988. Кн. 7;

Кавалеры ордена Славы трёх степеней: Краткий биогр. словарь. М., 2000.

Автор — М.З.Хәбибуллин