Милли-мәдәни мохтарият нигезләрен эшләү комиссиясе

1917 елның 22 июлендә Бөтенроссия мөселманнарының икенче корылтае, Бөтенроссия мөселман гаскәриләренең беренче корылтае, Бөтенроссия мөселман руханилары корылтае делегатларының (1 меңнән артык кеше) берләштерелгән утырышында Эчке Россия һәм Себер төрки-татарларының милли-мәдәни мохтарият кануннары караламасын (проектын) эшләү өчен оештырыла.

Беренче составы: комиссия рәисе — С.Максуди, рәис урынбасары — Ибн. Әхтәмов; әгъзалар — Г.Шәрәф, Ә.Мөхетдинова, Ф.Кәримов, К.Кәримов, Н.Хәлфин, Һ.Атласов; кандидатлар — Н.Корбангалиев, Г.Исхакый, Г.Абызов, Г.Терегулов.

1917 елның августыннан эшен Уфада дәвам итә. Яңартылган составы: С.Максуди (рәис), Ибн.Әхтәмов (урынбасар); әгъзалар — Г.Шәрәф, Ә.Мөхетдинова, Һ.Атласов, Н.Корбангалиев, Г.Терегулов, С.Мамлиев, С.Урманов, Ш.Алкин, Г.Шинаси.

Комиссия Идел-Урал төбәгендәге мөселман халкы турында мәгълүмат җыю, Милләт Мәҗлесенә әзерлек һәм аны уздыру, сайлауларны оештыру кебек эшләр белән шөгыльләнә. Булачак мохтариятнең төп принциплары һәм структурасы бәян ителгән «Милли-мәдәни мохтарият нигезләре» проектын матбугатта бастырып чыгара.

1917 елның декабрендә эшчәнлеге туктатыла.

Тагиров И.Р. История национальной государственности татарского народа и Татарстана. К., 2000.