1913 елның 17 гыйнвары, Казан губернасы, Чистай өязе Мөслим авылы — 1945 елның 13 марты.

Командирлар составын камилләштерү курсларын тәмамлый (1938).

1935–1937 елларда һәм 1941 елдан Кызыл Армия сафларында. 1941 елның июненнән Бөек Ватан сугышы фронтларында, 458 нче укчы полкның батальон өлкән адъютанты (27 нче армиянең 78 нче укчы дивизиясе). Дала, Воронеж һәм 3 нче Украина фронтлары гаскәрләре составында Белгород-Харьков (1943) һәм Житомир-Бердичев (1943–44) һөҗүм операцияләрендә катнаша. Тюкреш хуторы (Бичке шәһәреннән төньяк-көнбатыштарак, Венгрия) янында дошман контрһөҗүмен кире кайтарганда батырлык күрсәтә: 1945 елның 13 мартында сафтан чыккан рота командирын алыштыра. Шәхсән үзе яндыргыч сыекча белән 2 танкны яндыра. Сугышта һәлак була.

Ленин ордены, 1 нче дәрәҗә Ватан сугышы, Кызыл Йолдыз орденнары, медаль белән бүләкләнә.

Чистай шәһәрендәге бер урам К.Х.Ситдыйков исеме белән атала. Туган авылында Геройга — бюст, Чистайда Геройлар аллеясында стела куела.

Батырлар китабы — Книга Героев. Казань, 2000.

Автор – М.З.Хәбибуллин.