Димтамак

1765 елдан мәгълүм. XVIII–XIX йөзләрдә халкы асабалар, типтәрләр һәм дәүләт крестьяннары катлауларына бүленә. Бу чорда халкының төп шөгыльләре – игенчелек һәм терлекчелек, шулай ук читкә китеп эшләү тарала.

1859 елгы мәгълүматларга караганда, авылда мәчет була. XIX йөз ахырында авыл җәмәгатенең имана җире 2378 дисәтинә тәшкил итә.

1920 елга кадәр авыл Самара губернасының Бөгелмә өязе Александровка волостена керә. 1920 елдан – ТАССРның Бөгелмә кантонында.

1930 елның 10 августыннан – Баулы, 1935 елның 10 февраленнән – Ютазы, 1963 елның 1 февраленнән – Бөгелмә, 1965 елның 12 гыйнварыннан – Баулы, 1991 елның 6 апреленнән – Ютазы районында.

Хәзер – Димтамак авыл җирлеге үзәге.

1930 елда авылда «Марс» колхозы оештырыла, 1953 елда – Маленков исемендәге колхоз (аңа Екатериновка поселогы, юкка чыккан Ишморат, Кызыл Ык, Уба авыллары хуҗалыклары да керә), 1958 елда – «Правда» колхозы (аңа Акъюл, Тарлау, Яссытугай авыллары хуҗалыклары да керә) итеп үзгәртелә.

1993 елдан – «Димтамак» акционерлык җәмгыяте, 1995 елдан – «Димтамак» күмәк хуҗалыгы, 2000 елдан – «Тугай» кооперативы, 2006 елдан – «Уңыш» җаваплылыгы чикләнгән җәмгыяте, шулай ук «Гәрәев Р.Р.» (2005 елдан), «Латыйпов Н.Р.» (2012 елдан) крестьян-фермер хуҗалыклары эшли.

Халкы башлыча «Уңыш» җаваплылыгы чикләнгән җәмгыятедә эшли, ит-сөт терлекчелеге һәм үсемлекчелек белән шөгыльләнә.

1920 елда авылда башлангыч мәктәп ачыла, 1947 елда – җидееллык, 1962 елда – сигезьеллык (1973 елда яңа бина төзелә), 1986 елда – урта, 2008 елда – тулы булмаган урта мәктәп итеп үзгәртелә. 1998 елдан мәктәптә туган якны өйрәнү музее (төбәк, мәктәп, колхоз тарихына караган 1200 дән артык экспонат исәпләнә; оештыручысы – Ш.Ә.Шайгуманов) бар.

Мәдәният йорты (1965 елдан; 2017 елдан – күпфункцияле үзәктә), «Аккош» балалар бакчасы (1993 елдан яңа бинада; әлеге бина 2013 елдан күпфункцияле үзәк буларак файдаланыла), китапханә (1929 елдан уку йорты буларак эшли башлый), фельдшер-акушерлык пункты, мәчет (1997 елдан) бар.

Мәдәният йорты каршында «Star» эстрада спорт биюләре студиясе (2018 елдан), «Ивушки» һәм «Рябинушка» фольклор коллективлары (икесе дә – 2021 елдан) эшли.

Авыл янында археология истәлеге – Димтамак туктаулыгы (бронза гасыр, буралы курган культурасы) табыла.

Ә.Н.Абдуллин (1947 елда туган) – техник фәннәр кандидаты, Башкортстан Республикасының һәм РФнең атказанган химигы;

Т.Д.Нәдершин (1944–2021) – Башкортстан Республикасының атказанган артисты.

1795 елда – 230 ир-ат;
1859 елда – 765,
1886 елда – 866,
1897 елда – 1033,
1920 елда – 1387,
1926 елда – 1190,
1938 елда – 742,
1949 елда – 707,
1958 елда – 761,
1970 елда – 784,
1979 елда – 651,
1989 елда – 540,
2002 елда – 549,
2010 елда – 556,
2020 елда – 518 кеше (татарлар).