Суровка

XVIII йөзнең беренче яртысында нигезләнә. 1860 елларга кадәр халкы удел (1797 елга кадәр – сарай) крестьяннары катлавына керә. Бу чорда халкының төп шөгыльләре – игенчелек һәм терлекчелек.

1773–1775 еллардагы Крестьяннар кузгалышы чорында авылдан 14 кеше Е.И.Пугачев гаскәренә чакырыла.

1870 елгы мәгълүматлар буенча, авылда 3 су тегермәне эшли. Авыл җәмәгатенең имана җире 1572,7 дисәтинә тәшкил итә.

1920 елга кадәр авыл Уфа губернасының Минзәлә өязе Мыс Чаллысы волостена керә. 1920 елдан – ТАССРның Минзәлә, 1921 елдан – Чаллы кантонында. 1930 елның 10 августыннан – Чаллы (1976 елның 20 апреленнән – Тукай) районында.

Хәзер – Яңа Троица авыл җирлегендә.

1930 елда «Красный Октябрь» колхозы оештырыла. 1957 елдан авыылда – «Татарстан» колхозы (үзәк утары – «Татарстан» совхозы поселогы), 1965 елдан – «Новотроицкий» совхозы (КамАЗның ярдәмче хуҗалыгы, үзәк утары – Яңа Троица авылы), 1996–2004 елларда – шул ук исемдәге җаваплылыгы чикләнгән җәмгыяте, 2011 елдан «Тукаевский племрепродуктор» җаваплылыгы чикләнгән җәмгыяте эшли.

Халкы башлыча үсемлекчелек һәм сөт терлекчелеге белән шөгыльләнә.

Авылда мәчет (2022 елдан) бар.

1795 елда – 410,
1870 елда – 786,
1897 елда – 848,
1913 елда – 970,
1920 елда – 872,
1926 елда – 756,
1938 елда – 667,
1949 елда – 310,
1958 елда – 232,
1970 елда – 207,
1979 елда – 247,
1989 елда – 195,
2002 елда – 264,
2010 елда – 385,
2020 елда – 1460 кеше (руслар – 45%, татарлар – 50%).