Югары Чыршылы

1730 елларда нигезләнә. Революциягә кадәрге чыганакларда Татар Чыршылысы исеме белән дә искә алына.

1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук балта эше һәм киез-киез итек басу тарала.

1859 елгы мәгълүматлар буенча, мәчет, мәдрәсә, су тегермәне эшли. 1880 елларда авыл җәмәгатенең имана җире 1082,1 дисәтинә тәшкил итә.

1920 елга кадәр авыл Уфа губернасының Минзәлә губернасы Язикәү волостена керә.

1920 елдан – ТАССРның Минзәлә, 1922 елдан – Чаллы кантонында. 1930 елның 10 августыннан – Сарман, 1935 елның 10 февраленнән – Ворошилов, 1957 елның 29 ноябреннән – Яңа Юл, 1959 елның 12 октябреннән Сарман районында.

Хәзер – Югары Чыршылы авыл җирлеге үзәге.

1930 елда «Кызыл тау» колхозы оештырыла. 1959 елда – берләштерелгән «Ленинчы» колхозына (үзәк утары – Югары Чыршылы авылы; шулай ук Түбән Чыршылы, Усай авыллары керә) кушыла.

1986 елдан авылда – берләштерелгән «Дружба» колхозы (үзәк утары – Ләке авылы), 1994–2002 елларда – «Чыршылы» күмәк предприятиесе, 2003–2005 елларда шул ук исемдәге авыл хуҗалыгы җитештерү кооперативы эшли.

Халкы башлыча кырчылык һәм терлекчелек белән шөгыльләнә.

1927 елда башлангыч мәктәп ачыла, 1939 елда – җидееллык, 1953 елда – тулы булмаган урта (1979 елда яңа бина төзелә), 1986 елда – урта, 2008 елда тулы булмаган урта мәктәп итеп үзгәртелә, 2011 елда ябыла.

Авылда мәдәният йорты (1972 елда элекке хосусый йортта ачыла, 2011 елдан – мәктәп бинасында), китапханә (1972 елдан – мәдәният йорты бинасында, 1974 елдан – аерым бинада, 2011 елдан – мәктәп бинасында), фельдшер-акушерлык пункты, «Иман нуры» мәчете (2000 елдан) бар.

Мәдәният йорты каршында 2014 елдан – «Театр сөючеләр» һәм 2018 елдан «Көлке төенчеге» театр коллективлары, 2018 елдан «Сәйлән» балалар бию коллективы эшли.

Р.Г.Фәрхетдинов (1943 елда туган) – инженер-геолог, Татарстан Республикасының фән һәм техника өлкәсендәге Дәүләт бүләге лауреаты.

1859 елда – 506,
1897 елда – 731,
1920 елда – 910,
1926 елда – 712,
1938 елда – 552,
1949 елда – 387,
1970 елда – 307,
1979 елда – 264,
1989 елда – 180,
2002 елда – 189,
2010 елда – 153,
2021 елда – 170 кеше (татарлар – 93%, руслар – 7%).